Guddoomiyaha Gobolka Banaadir Mudane Yuusuf Xuseen Jimcaale (Madaale)ayaa xariga ka jaray xarunta Dad-dhigista dowladda hoose Xamar ee degmooyinka qeybta bari oo laga hirgaliyay degmada Yaaqshiid.
Xaruntaan cusub uu xariga ka jarau duqa magaalada Muqdisho ayaa loogu tala galay in loogu adeego dadweynaha kunool degmooyinka bari ee gobolka Banaadir, kuwaa oo horey dhib weyn ugu qabay doonashada warqada dhalashada.
Munaasabadda xarig-jarka waxaa goob joog ka ahaa xildhibaano katirsan DFS, guddoomiye ku-xigeenka amniga iyo siyaasada maamulka gobolka Banaadir, xog’hayaha Guud ee maamulka gobolka, maamulka Degmada iyo qeybaha bulshada rayidka.
.Guddoomiyaha gobolka Banaadir Yuusuf Xuseen Jimcaale (Madaale) ayaa boggaadiyay howlaha ay waaxda dad-dhigista soo kor dhisay iyo horumarinta lagu sameeyay adeegyada ay bulshada siiso, waxa uuna xusay in xaruntan u adeegi doonto dadka degan bariga caasimadda.
