Madaxweynaha Koonfur Galbeed Mudane, Cabdicasiis Xasan Maxamed Laftagareen ayaa Madaxtooyada Baydhabo ku qaabilay Ergeyga gaarka ah ee Madaxweynaha Jamhuuriyada uqaabbilsan Wada-hadallada Soomaaliland Mudane, Cabdikariin Xuseen Guuled oo maanta Baydhabo gaaray.
Ergayga Gaarka ah iyo Madaxweyne Laftagareen ayaa ka wada hadlay hannaanka loo wajahayo wada hadallada DFS iyo Somaliland.
“Waxaan maanta Safar Shaqo ku gaaray Magaalada Baydhabo ee Xurunta KMG Dowladd Goboleedka KOONFUR GALBEED, halkaas oo ay nooga bilaaban doonaan kullamo wadatashi ah oo aan la yeelaneyno Madaxda SWS iyo Bulshada deegaanka.
Madaxweyne Cabdicasiis Laftagareen ayaa soo dhaweeyay dedaallada Xafiiska Ergayga, isagoo u muujiyay garab istaag buuxa,wuxuuna Ergayga dhankiisa Madaxweynaha uga mahadceliyay talooyinkiisa wanaagsan iyo aqbalaadda qorshahiisa.
Kulamadan Wadatashiga ah ayaa ku qotoma sidii ay Madaxda iyo Bulshada KOONFUR GALBEED kaga tala dhiiban lahaayeen qorshaha dib u billaabidda hanaanka Wadahadallada DFS iyo Somaliland.
