Guddoomiyaha Golaha Shacabka Baarlamaanka Federaalka Soomaaliya Sheekh Aadan Maxamed Nuur (Madoobe) ayaa si adag uga hadlay xildhibaannada caadada ka dhigtay in ay ka maqnaadaan fadhiyada golaha shacabka.
Sheekh Aadan Madoobe ayaa sheegay in fadhiyada baarlamaanka mar kasta ay ka maqnaadaan 130-xildhibaan tiro aan ka yareyn, waxa uuna sheegay in aan la aqbali karin in xildhibaannada fasax la’aan maalin kasta ay isaga maqnaadaan.
Waxa uu sheegay Aadan Madoobe loo baahan yahay dhaqan-gelintiisa xeer-hoosaadka golaha shacabka si loola xisaabtamo mudaneyaasha maqan , waxa uuna u mahad-celiyay xildhibaannada joogtada u yimaada kulamada golaha shacabka.
“Xildhibaannada Golaha Shacabka waxaa guud ahaan nahay 275 Xildhibaan, fadhiyada waxaa imaada 145 Mudane halka ay maqan yihiin 130 kale oo aan wax cudur daar ama fasax ah intooda badan laga heyn, Xildhibaanno badan ayaa inta noo yimaadeen nagu dhaheen Guddoomiye maxay u maqan yihiin Xildhibaannadaas waa sax hadalkaas balse waxa ay ahayd in aan annaga dhahno oo aan la xisaabtanno” ayuu yiri Aadan Madoobe.
Guddoomiye Aadan Madoobe ayaa sheegay in la dhaqan-gelinayo xeer hoosaadka golaha si loo ciqaabo xildhibaannada maqan, waxa uuna tilmaamay in xeer-hoosaadka uu dhigayo in xildhibaankii maqnaadaa fadhiyada golaha labo sanno fasax la’aan uu xilka weenayo.
