Diyaarad rakaab siday oo leedahay shirkadda diyaaradaha Halla ayaa duhur-nimadii maanta ku dhacday garoonka diyaaradaha Aadan Cadde ee magaalada Muqdisho, waxaana shilkan ka dhashay khasaaro.
Diyaarada shilka ku gashay garoonka Aadan Cadde ayaa kasoo duushay garoonka diyaaradaha ee magaalada Garawe, waxaana diyaaradan la socday 30-qof oo rakaab ahaa iyo afar qof oo ahaa shaqaalaha diyaarada.
Wasiirka Gaadiidka iyo Duuliista xukuumadda Soomaaliya Fardowsa Cusmaan Cigaal ayaa sheegtay in diyaarada ku dhacday dhabaha diyaaradaha ku ordaan, waxa ayna sheegtay in shilkan kaliya ku dhaawacmeen labo qof oo rakaabka kamid ahaa.
Waxa ay sheegtay wasiirka in ay socdaan baaritaano ku aadan waxa sababay shilkan, waxa ayna beenisay in diyaaradan ay la socdeen R/wasaareyaashii hore ee Dalka Cabdiwali Cali Gaas iyo Cumar Cabdirashiid Cali Sharmaarke.
”Diyaarad ay leedahay shirkadda Halla Airline ayaa ku dhacday dhabaha diyaaradaha (Runway Airport). Shilkan wuxuu sababay dhaawaca 2 qof ma jirto wax dhimasho ah. Baaritaanno ay wadaan waax-yaha ku shaqada leh ayaa socda. Diyaarada masaarnan R/wasaareyaashii hore ee Dalka Cabdiwali Cali Gaas iyo Cumar Cabdirashiid Cali Sharmaarke” ayey tiri wasiirka gaadiidka.
Diyaarada ku dhacday garoonka diyaaradaha Aadan Cadde ayaa waxaa soo gaaray bur bur xooggan, waxaana la badbaadiyay rakaabkii diyaarada la socday, labada qof ee shilkan ku dhaawacmay ayaana loola cararay isbitaal kuyaalla Muqdisho.
