Degaanka Baardheere oo ku yaalla duleedka magaalada Beledweyne ee gobolka Hiiraan ayaa waxaa caawa lagu dilay nin oday ahaa oo laga yaqiinay degaanka.
Goob joogayaal ayaa sheegay in ninka la beegsaday oo lagu magacaabi jiray Tobane Ciilow xilliga la dilayey uu watay gaari nooca raaxada ah.
Ilo wareedyo ayaa waxa ay inoo sheegeen in Tobane ay beegsadeen rag hubeysan, kuwaasoo oo dilka kadib ka kaxeystay gaari yar oo uu watay marxuumka.
Wiil uu dhalay marxuumka ayaa dilkan ku eedeeyay iney aabihiis u geysatay kooxda Al Shabaab
“Baladweyne ayuu ka baxay wuxuuna ku sii jeeday degaanka Booco, gaari Noah ayuu watay, Al Shabaab ayaa ku qabatay degaanka Baardheere, Ka dibna way dileen” ayuu yiri wiilkan oo la hadlay qaar ka mid ah warbaahinta gudaha.
Kooxda Al-shabaab iyo Maamulka gobolka Hiiraan weli kama aanay hadlin dilkan, mana jiraan warar madax banana oo sheegaya sida uu dilkan u dhacay iyo sababta ka dambeysay.
Xafiiska Shabakada Allbanaadir.com
Muqdisho Somalia
Allbanaadir@live.com
