Booliiska Faransiiska iyo dad mudaaharaadayey ayaa isku dhac ku dhexmaray socod ka socday xaafadda Nanterre ee magaalada Paris ka dib markii wiil dhalinyaro ah oo lagu magacaabi jiray Nahel uu nin booliis ah ku toogtay meel ay taraafikada ku sugnaayeen Talaadadii.
Dibad-baxayaasha ayaa xalay geystay tuuryeyn xilli ay ku jireen dibad baxyo rabshadeysan, waxaana booliisku ay ugu jawaabeen sunta dadka ka ilmeysiisa.
Kumanaan kun oo qof ayaa maanta isugu soo baxay dibad bax ay ku dalbanayaan in Nahel cadaalad loo helo Waxaana hogaaminaysa hooyadii.
Dawladda ayaa daabushay 40,000 oo booliis ah iyadoo la filayo in rabshado kale ay dhacaan. Taraamyada iyo basaska waxay joojin doonaan adeegyada goor hore meelaha qaar
Askarigii toogtay Nahel ayaa xabsiga loo taxaabay kadib markii lagu eedeeyay dil, waxaana uu hadda ku jiraa xabsi guri.
Kumanaan ayaa soo buux dhaafiyay waddooyinka. Iyada oo kor fuushay gaadhi dabaq ah, hooyada dhashay wiilka ayaa gacanta u haadisay dadkii oo xirnaa funaanad cad oo ay ku qoran tahay “Cadaalad Nahel” iyo taariikhda uu dhintay.
Qalalaasaha ayaa dib u soo nooleeyay rabshadihii 2005-tii ee Faransiiska gilgilay muddo saddex toddobaad ah, kuna qasbay madaxweynihii xilligaas Jacques Chirac inuu ku dhawaaqo xaalad degdeg ah.
Rabshadahaas ayaa ka qarxay xaafadda Paris ee Clichy-sous-Bois waxayna ku fideen dalka oo dhan ka dib markii ay dhinteen laba dhallinyaro ah oo koronto qabatay xilli ay ka dhuumanayeen booliiska.
Waxaa jiray saddex dil oo noocan oo kale ah 2021 iyo laba 2020, sida ay sheegtay wakaaladda wararka ee Reuters, taasoo muujinaysa inta badan dhibanayaasha tan iyo 2017 ay ahaayeen madow ama asal Carab ah.
Karima Khartim, oo ah xildhibaan ka tirsan golaha deegaanka ee Blanc Mesnil ee waqooyiga bari ee Paris, ayaa sheegtay in dulqaadka dadku uu sii yaraanayo.
HOOS KA DAAWO SAWIRRO
