Askari katirsan ciidanka milatariga federaalka dalka Itoobiya ayaa dad shacab ah dil iyo dhaawac ugu geestay magaalada Qabridahar ee xarunta gobolka Qorraxeey ee dowlad Deegaanka Soomaalida Itoobiya.
Sida aan wararka ku helnay askarigan ayaa saakay magaalada Qabridahar ku toogtay afar qof oo saddex kamid ah rag yihiin halka mida kalana tahay haweeney, waxa uu sidoo kale dhaawac u geestay dhowr qof oo kale.
Dadka uu dilay askarigan katirsanaa milatariga Itoobiya waxaa ku jiray guddoomiyaha xaafadda Lixaad ee maamulka magaalada Qabridahar, lamana shaacin ilaa hadda sababta uu askarigan u dilay dadka shacabka ah iyo masuulka maamulka katirsanaa.
Ciidamo katirsan milatariga Itoobiya oo goobta ku sugnaa ayaa isku dayay in ay gacanta ku dhigaan askariga dilka geestay, hasa ahaatee iska hor imaad uu ciidanka kala hortagay ayaa keentay in isla goobta ciidamada ku dilaan.
Maamulka dowlad Deegaanka Soomaalida Itoobiya ayaa sheegay in ay socdaan baaritaano la xiriira kiiskan dilka ah, maamulka ayaana sheegay in khubaro loo xil saaray in baaris ku sameeyaan dilkan aragagaxa lahaa ee ka dhacay magaalada Qabridahar.
