Wareegto uu soo saaray madaxweynaha dowlad goboleedka Puntland Mudane Siciid Cabdullaahi Deni ayaa xilka looga qaaday wasiirkii amniga maamulkaasi Cabdisamad Maxamed Galan iyo wasiir kuxigeenka arrimaha gudaha Cabdiweli Mire Xirsi.
Madaxweyne Deni wareegtada xil ka qaadista uu soo saaray kagama uusan hadlin sababta keentay in uu xilka ka qaado wasiiradan katirsanaa maamulkiisa , kana mid ahaa xubnaha aadka ugu dhaw dhaw.
Sida aan wararka ku helnay madaxweyne Deni iyo wasiiradan uu xilka ka qaaday ayaa muddooyinkan siyaasad ahaan aad u kala fogaa, wasiirka amniga ayaa maalmihii lasoo dhaafay ku sugnaa magaalada Nairobi ee caasimadda dalka Kenya.
Halkan ka akhriso wareegtada uu soo saaray madaxweyne Deni
Madaxweynaha Dowladda Puntland Mudane Siciid Cabdullaahi Deni, ayaa soo saaray Xeer Madaxweyne Lr. 26, 17 June 2023, Kuna saabsan xil ka qaadis.
Madaxweynaha Dowladda Puntland
Markuu arkay: Dastuurka Dowladda Puntland Qodobkiisa 80aad.
Markuu arkay: Xil gudasha la’aantooda
Wuxuu xeeriyey:
Waxaa xil ka qaadis lagu sameeyay:
1. Cabdisamad Maxamed Galan, Wasiirka Amniga iyo DDR-ta Puntland.
2. Cabdiweli Mire Xirsi, Wasiir Ku-xigeenka Wasaaradda Arrimaha Gudaha , Federaalka iyo Dimuqraadiyeeynta Puntland.
Xeerkani wuxuu dhaqan gelayaa markuu Madaxweynuhu saxiixo, Wuuna saxiixay.
DHAMMAAD
