Wakiilka gaarka ah ee golaha Midowga Afrika ahna Madaxa hawlgalka ATMIS, Danjire Mohamed El-Amine Souef ayaa booqday dhaawacyada qaar kamid ah askartii ku dhaawacantay weerarkii Al Shabaab ku qaadeen Buulamareer.
Madaxa howlgalka ATMIS waxaa booqashadiisa ku wehliyay safiirka dowladda Uganda u jooga Soomaaliya Sarreeye Gaas Nathan Mugisha, iyo Taliyaha ciidamada ATMIS Sarreeye Guud Sam Okiding.
Masuuliyiintan booqatay dhaawacyada ciidamada ATMIS, gaar ahaan kuwa kasoo jeeda dalka Uganda ayaa warbixin laga siiyay xaalada askarta dhaawacyada qaba, waxa ayna saraakiisha xaalada ciidankan gacanta ku haya sheegeen in xaaladooda soo hagaageyso.
Ku-simaha Safiirka Uganda ee Soomaaliya, Gen. Nathan Mugisha, ayaa sheegay in ciidamada Uganda ay ku adkeysanayaan go’aankooda ah inay sii wadaan howlgalladooda nabad ilaalinta, kadib weerarkii lagu qaaday saldhigooda Buulamareer.
“Waxaan gacanta ku haynaa xaaladda, dib-u-qiimeynta, iyo u socoshada sidii loo qorsheeyay. Dhacdadu nagama jeedin doonto. Waxaan sii wadi doonnaa geeddi-socodka xasilinta Soomaaliya, annagoo taageernayna Dowladda Federaalka, Ciidanka Xoogga Dalka, iyo shacabka si ay u helaan xasillooni, horumar dhaqaale, iyo isbeddel,” ayuu yiri Maj. Gen.Mugisha.
Dowladda Uganda ayaa qiratay askar badan iyo saraakiil looga dilay weerarkii Al Shabaab ku qaadeen saldhigaooda Buulamareer, waxa ayna Al Shabaab oo weerarkaasi geesataY sheegeen in ay dileen in ka badan 137 askari oo katirsan ATMIS.
