Ra’iisul Wasaaraha Somalia Mudane Hamza Abdi Barre ayaa sheegay in dib loo dhigay Imtixaanka shahaadiga ah ee ardayda Magaalada Beledweyne sababo la xiriira fatahaadda uu sameeyey webiga Shabeelle.
Xamse Barre ayaa hadalkan ka sheegay munaasabad lagu shaaciyey natiijada Macallimiintii u tartamaayey shaqada ay soo bandhigtay Wasaaradda waxbarashada.
Waxaa uu sheegay in magaalada Baladweyne ay ka jirto xaalad bani aadamnimo oo aan saamexeynin in laga qabto imtixaanka shahaadiga ah ka dib markii ay fatahaada webiga ka qaxeen kumanaan qoys.
Xamse Barre ayaa sheegay in qaar ka mid ah xarumihii Waxbarashada Balad-weyne ay saameysay fatahaada sidaas awgeedna aysan suuragal aheyn in xiligan lagu qabto imtixaan.
“Ardayda Baladweyne waxaa loo diyaarin doonaa imitixaan gaar ah oo ay geli doonaan marka ugu horeysa ee suuragal noqoto, wasaaradaha waxbarashada heer federaal iyo dowlad goboleed ayaana arrintaas ka wada shaqeyn doona” ayuu yiri Xamse Barre.
27ka bishan May ayaa lagu wadaa inuu qeeybo ka mid ah dalka ka bilowdo imtixaanka shahaadiga ah ee dugsiyada sare sida ay horey u shaacisay Wasaarada waxbarashada Somalia.
Xafiiska Shabakada Allbanaadir.com
Muqdisho Somalia
Allbanaadir@live.com
