Siyaasasiyiin ku kacsan Madaxweyne Deni ayaa ku gacan seyray hadal ka soo yeeray maamulka Puntland oo ahaa inay diyaar u tahay wada-hadal ay la gasho siyaasiyiinta diiddan doorashooyinka qof iyo cod ee lagu wado iney 25ka bishan ka dhacaan degaano ka tirsan Puntland.
“Wadahadalka siyaasiyiinta diiddan Doorashooyinka Golayaasha Deegaanka diyaar ayaan u nahay” ayuu yiri wasiirka arrimaha gudaha Puntland Cabdi Faarax Juxaa oo qoraal kooban ku baahiyey baraha bulshada.
Hase ahaatee madasha siyaasiyiinta Puntland ayaa hadalka Wasiir Juxa ku sifeeyey mid lagu marin habaabinayo shacabka.
“Madasha Siyaasada Puntland waxay cadaynaysaa inaynan jirin wax kulan ah oo ay u balansanayeen wasiirada xakuumadda Madaxweyne Deni oo ku aadan ka wada hadalka doorayshooyinka afduuban ee ay Xakuumadda Deni wado” ayaa lagu yiri qoraalka siyaasiyiinta.
Siyaasiyiinta Mucaaradka ee diiddan doorashooyinka qof iyo cod ayaa sida la sheegayo dalbanaya in marka hore Madaxweyne Deni uu caddeeyo mowqifkiisa ku aadan doorashada madaxtooyada Puntland ee January 2024, waxayna qabaan shaki balaaran oo ah Deni uu doorashooyinka goleyaasha degaanka ku hoos qarinayo muddo kororsi taasoo ay sheegeen ineysan aqbali doonin.
Xafiiska Shabakada Allbanaadir.com
Muqdisho Somalia
Allbanaadir@live.com
