Dhaqtar u dhashay dalka Australia oo 88 jir ah oo muddo ka badan 7 sano ay haysteen kooxaha Islaamiyiinta ee Galbeedka Afrika ayaa la sii daayay, wuxuuna dib ugu laabtay Australia.
Kenneth Elliott waxa uu ahaa mid badqaba oo wanaagsan waxa uu dib ula midoobay xaaskiisa iyo caruurtiisa sida ay sheegtay wasiirka arrimaha dibadda Australia.
“Aad ayaan ugu faraxsanahay in Dr. Ken Elliott, oo lagu haystay Galbeedka Afrika ilaa toddoba sano, uu dib ula midoobay qoyskiisa,” Wong ayaa u sheegay suxufiyiinta Sydney.
Elliott iyo xaaskiisa ayaa lagu afduubay Burkina Faso, halkaasoo ay ku lahaayeen xarun caafimaad muddo afartan sano ah. Jocelyn Elliott ayaa la sii daayay saddex toddobaad ka dib afduubka.
“Waxaan rabnaa inaan u mahadcelino Ilaah iyo dhammaan intii sii waday inay noo duceeyaan,” Elliott qoyskiisa ayaa ku yiri bayaan ay soo saareen.
“Waxaan muujineynaa sida aan ku faraxsanahay in Dr. Elliott uu xor yahay, waxaana u mahadcelineynaa dowladda Australia iyo dhammaan intii ka qayb qaadatay muddo ka dib sidii loo soo deyn lahaa,” ayaa lagu yiri bayaanka qoyska.
Qoyska ma faahfaahin xaaladaha sii deynta Elliott. Dhakhtarka ayaa ka yimid magaalada xeebta galbeed ee Perth.
Kooxda xagjirka ah ee ka dambeysay afduubka, Al-Qaacidada Maqribul Islaami, ayaa qayb weyn ku leh hawlgallada afduubka madax-furasho ee ay ku beegsanayaan shaqaalaha gargaarka ee ajnabiga ah iyo dalxiisayaasha.
Maalintii la afduubay lamaanaha Australia – Jan. 15, 2016 — 30 qof ayaa lagu dilay weerar ay ka kooxdasa ka fulisay caasimadda Burkina Faso ee Ouagadougou.
Garabka Waqooyiga Afrika ee Al-Qaacida ayaa sheegatay mas’uuliyadda weerarkaas iyo weerarro kale oo caan ah oo ka dhacay Galbeedka Afrika bilo ka hor, oo ay ku jiraan 20 qof oo lagu dilay weerar lagu qaaday hoteel ku yaalla caasimadda Mali ee Bamako.
Elliotts ayaa laga afduubay meel u dhow magaalada Djibo ee waqooyiga Burkina Faso, una dhow xadka Mali iyo Niger.
Jocelyn Elliott ayaa lagu sii daayay dalka deriska la ah ee Niger. Madaxweynaha Niger Mahamadou Issoufou wuxuu kala shaqeeyay sirdoonka Burkina Faso sidii loo sii deyn lahaa dhaqtarka.
Xafiiska Shabakada Allbanaadir.com
Muqdisho Somalia
Allbanaadir@live.com
