Ciidamada ammaanka ayaa saakay gacanta kusoo dhigay nin la sheegay in qarax bambaano ku weeraray goob ay degmada Hodan kaga sugnaayeen ciidamo katirsan booliiska Soomaaliya.
Sida aan wararka ku helnay ninkan oo la sheegay in uu katirsan yahay Al Shabaab ayaa bambaano ku tuuray fariisin ciidanka kaga sugnaayeen xaafada jaamacadaha, waxaana ninkan oo orday eryaday ciidamo katirsan dowladda oo gacanta kusoo dhigay.
Ciidamada ayaa markii gacanta kusoo dhigeen ninkan wareysi ay ka qaadeen ku helay xogta labo haween ah oo ninkan weerarka kala shaqeeyay, ciidamada ayaana haweenkaasi kasoo qabtay xaafada Haanta Dheer ee degmada Hodan.
Saraakiil katirsan laamaha ammaanka oo warbaahinta si hoose ula hadlay ayaa sheegay ninka bambaanada tuuray iyo haweenka caawiyay xabsiga la dhigay, waxa ayna xuseen in baaritaano lagu wado lana horgeyn doono caddaaladda.
Ammaanka magaalada Muqdisho ayaa muddooyinkii dambe si weyn loo adkeeyay, waxaana magaalada ka howlgala ciidamo cusub oo laga keenay dalka Uganda, kuwaa oo qeyb weyn ka qaatay xasilinta caasimadda Muqdisho.
Xafiiska Shabakada Allbanaadir.com
Muqdisho Somalia
Allbanaadir@live.com
