Nin u dhashay dalka Kenya ayaa kusoo labistay dharka dumarka xirtaan gaar ahaan dharka gabdhaha Islaamka ku labistaan ee xijaab iyo indha shareer , si uu uga qeyb galo tartanka ciyaarta shaxda nooca loo yaqaan “chess-ka” oo lagu qabtay magaalada Nairobi.
Stanley Omondi oo 25-sanno jir ah ayaa isku diiwaan geliyay in uu yahay gabar, waxa uuna qortay magac dumar oo ah Millicent Awour, ninkan ayaa soo xirtay dharka dumarka xijaab iyo indha shareer si tartanka ugu guuleesto loona fahmin.
Qaban qaabiyaasha tartanka ciyaarta shaxda ee “chess-ka” ayaa ka shakiyay guulo wax ku ool ah uu ninkan tartanka ka gaaray, waxaa sidoo kale shakiga laga muujiyay ninkan sii xoojiyay kabaha uu xirnaa iyo inta ciyaarta socotay uusan marnaba hadleyn.
“Markii hore wax shaki ah kama aanan qabin, sababtoo ah xirashada xijaabka waa wax iska caadi ah. Laakiin intii aan wadnay, waxaan ogaanay inuu ka badiyay ciyaartoy aad u xoogan, waxaan kaloo ka shakinay kabaha uu xirnaa oo ahaa kuwa ragga ah oo ka weyn kuwa dumarka, waxaan sidoo kale ogaanay inuusan hadlin, xitaa markii uu gurayanayey dhagaxaantiisa, ciyaarta marka ciyaareyso waa in ada la hadashaa sida caadada ah qofka aad la ciyaareyso mana uusan sameyn sidaas” ayuu yiri Madaxweynaha ciyaarta Chess-ka ee Kenya Bernard Wanjala .
Ninka iska soo dhigay dumarka ee ku fashilmay qorshihiisa ayaa raali-gelin ka bixiyay ficilka uu sameeyay, waxa uuna sheegay ninkan in baahi dhaqaale arrintan ku sababtay uuna doonayay in uu helo lacag.
Stanley Omondi ayaa caan ku ahaa ciyaarista shaxda, hasa ahaatee ninkan ayaa aaminay in uusan guul ka keeneyn tartanka raga loo qabto sidaasna qeybta dumarka u galay, waxaana ninkan la filayaa in lagu rido ganaax adag.
Tartankan Kenya Open oo la qabtay todobaadkii hore ayaa ah tartan sanadle ah oo lagu qabto magaalada Nairobi, waxaana tartankan ka qeyb galay haween aad u badan, ku guuleestaha tartanka ayaana helaya lacag dhan $3,000 oo doolar.
Xafiiska Shabakada Allbanaadir.com
Muqdisho Somalia
Allbanaadir@live.com
