Milateriga Israa’iil ayaa sheegay in saddex gantaal oo laga soo tuuray Suuriya kuna sii jeeday Israa’iil xalay taasoo sare u kacday tirada gantaallada lagu riday saacado gudahood.
Ciidamada Israa’iil ayaa sheegay inay gantaalo aargoosi ku rideen deegaanka Suuriya ka tirsan ee gantaallada laga soo tuuray.
Arrimahan ayaa imaanaya ka dib maalmo ay sii kordhayaan rabshadaha wajiyo badan leh ee ku saabsan xiisada ka taagan magaalada Jerusalem iyo ciidamada booliska Israel oo weeraray masjidka Qudus oo ah goobta ugu xasaasisan ee barakeysan.
Laba ka mid ah gantaallada ayaa ka tallaabay xadka Israa’iil, iyadoo mid la qabtay midna uu ku dhacay meel bannaan ah, sida ay ciidamadu sheegeen. Weerarka koowaad, hal gantaal ayaa ku dhacay beer ku taal buuraha Golan ee ay Israa’iil la heysato, Qaybo ka mid ah gantaal kale oo la burburiyay ayaa ku dhacay dhulka Urdun ee u dhow xudduudda Suuriya, sida ay sheegeen militariga Jordan.
Lama soo warin wax khasaare ah oo ka dhashay.
Dhinaca kale, koox falastiiniyiin ah oo fadhigeedu yahay magaalada Dimishiq ee daacadda u ah nidaamka Suuriya ayaa sheegtay mas’uuliyadda saddexda gantaal ee Israa’iil lagu riday sida uu sheegay TV-ga Al-Mayadeen ee fadhigiisu yahay Beirut.
Warbixintu waxay soo xigatay guutada Al-Qudus oo ah maleeshiyaad ka duwan garabka hubaysan ee Jihaad Islaami ah ee falastiiniyiinta oo wata magac la mid ah, in ay sheegtay si ay uga aargutaan weerarkii ay boolisku ku qaadeen Masjidka Al-Aqsa.
Suuriya, la-taliyaha Madaxweyne Bashar Assad ayaa ku tilmaamay weerarrada gantaallada inay yihiin qeyb ka mid ah jawaabihii joogtada ah ee cadowga arxanka darran.
Daanta Galbeed ee la haysto, ciidamada ammaanka Israa’iil ayaa si ba’an u toogtay wiil 20 jir ah oo Falastiini ah magaalada Azzun, sida ay sheegeen saraakiisha caafimaadka Falastiiniyiinta, taas oo kicisay mudaaharaadyo.
Milateriga Israa’iil ayaa sheegay in ciidamada ay rasaas ku fureen Falastiiniyiin dhagxaan iyo walxaha qarxa tuurayay. Wasaaradda caafimaadka Falastiin ayaa ku sheegtay falastiiniga la dilay in lagu magacaabi jiray Ayd Salim.
Dhimashadiisa ayaa timid xilli rabshado aan caadi ahayn ay ka socdeen Daanta Galbeed. In ka badan 90 falastiiniyiin ah oo ay Israa’iil ku dishay ilaa hadda sanadkan, ugu yaraan kala badh waxay xiriir la leeyihiin kooxaha xagjirka ah, sida lagu sheegay tiro koob ay samaysay Wakaaladda wararka ee Associated Press.
Weerarrada Falastiiniyiinta ee Israa’iiliyiinta ayaa dilay 19 qof wakhtigaas – oo ay ku jiraan Jimcihii laba nin oo British-Israa’iil ah oo lagu toogtay meel u dhow deegaan ku yaal dooxada Jordan iyo dalxiise Talyaani ah oo lagu dilay qof looga shakisan yahay inuu gaari ku jiirsiiyay magaalada Tel Aviv.
Xafiiska Shabakada Allbanaadir.com
Muqdisho Somalia
Allbanaadir@live.com
