Dagaalyahano katirsan Al Shabaab ayaa saakay weerar xooggan ku qaaday saldhig ciidanka milatariga Soomaaliya ku leeyihiin duleedka magaalada Baydhabo ee xarunta KMG ee maamulka Koonfur Galbeed.
Sida aan wararka ku helnay kooxda Al Shabaab ayaa weerar culus ku qaaday salaadii subax kaddib saldhig ciidanka ku lahaayeen deegaanka Makuude oo qiyaasti 7 KM dhanka koonfurta ka xiga Baydhabo.
Dagaal culus oo khasaaro badan kasoo kala gaaray labada dhinac ayaa dhax maray ciidanka dowladda iyo kuwa Al Shabaab, waxaana markii dambe dagaalka la sheegay in lagu jabiyay kooxdii weerarka soo qaaday.
Saraakiisha ciidanka dowladda Soomaaliya ayaana sheegay in dagaalka saakay Al Shabaab uga dileen 14-xubnood oo kamid ahaa ragii weerarka soo qaaday, waxaana sawirrada meydadka raga la dilay lagu baahiyay warbaahinta dowladda.
Al Shabaab ayaa inta badan weerarada gaadmada ah oo ay geestaan xilliyada aroortii guulo ka gaari jirtay, waxaana weerarkan saakay dhacay u muuqdaa mid khasaaro badan uu kasoo gaaray kooxdii weerarka fulisay.
Xafiiska Shabakada Allbanaadir.com
Muqdisho Somalia
Allbanaadir@live.com
