Dil dad badan ka argagaxeen ayaa saakay ka dhacay gudaha masaajid kuyaalla deegaanka Garasbaaley ee duleedka magaalada Muqdisho, kaddib markii Mu’adin masjid uu dil u geestay Imaamkii Masaajidka.
Sida aan wararka ku helnay dilkan argagax leh ayaa dhacay, kaddib markii uu muran soo kala dhax galay Mu’adinka masaajidka iyo wiil yar oo gacan yare u ahaa imaamka masaajidka kuyaalla deegaanka Garasbaaley.
Mu’adinka masjidka oo carreesan ayaa soo qaatay baangad af badan, waxa uuna ku weeraray wiilka yar ee muranka kala dhaxeeyay, hasa ahaatee Imaamkii masjidka oo soo kala dhax galay ayuu ku dhuftay baangada sidaasna ku dilay.
Dadka deegaanka ayaa ku waramay in Imaamka la dilay uu saakay salaadii subax jameecada masjidka dujiyay halka mu’adinka uu isna aqimay , waxa ayna xuseen in dhacdadan aad uga argagaxeen dadka deegaanka.
“Saaka Garasbaaley shaqaaqo aan la yaabnay ayaa ka dhacday ,laba nin oo masaajidka midna imaam ka ahaa midna mu’adin ayaa is qoomay, waxaana la dilay imaamkii masjidka. labaduba salaadda subax mid waa aqimay midna dadkii ayuu tujiyay” ayuu yiri mid kamid ah dadka deegaanka Garasbaaley.
Waxa ay sheegeen dadka deegaanka in dilkan argagaxa lahaa uu ka dhashay sawir la qaaday, waxaana la sheegay in markii salaada subax la dukaday kaddib uu muran ku dhax maray gudaha masjidka , imaamka, gacan yarihiisa iyo mu’adinka dilka geestay.
“Waxa wax dilay waa mu’adinka waxa la dilayne waa imaamkii marka salaadda subax laga kala baxay oo laga kala tegay waxaa ku haray isaga iyo ninka imaamka ahaa oo sidoo kale ahaa Macallin Dugsi Qur’aan iyo gacan yaraha imaamka oo isna kabiir ka ah dugsiga, kadibna wiilka kabiirka iyo ninkaan wax dilaayo ayaa diriray sawir laga qaaday ayaa la’isku qabtay kadib ninkaas canuga ayuu dili rabay imaamkii canuga ayuu isku hordhigay shan baangad ayaa ku dhacday meesha ayuuna ku ruux baxay,”ayuu yiri qof kamid ah dadka deegaanka.
Dilkan argagaxa lahaa ee saakay ka dhacay masjidka kuyaalla deegaanka Garasbaaley ayaa noqotay dhacdo ay si weyn u hadal hayaan dadka deegaanka, waxa ayna noqotay dhacdo ugub ah dilka nuucaan oo kala ah.
Xafiiska Shabakada Allbanaadir.com
Muqdisho Somalia
Allbanaadir@live.com
