Kumanaan dibadbaxayaal ah oo kasoo horjeeda dowladda Kenya ayaa maanta isugu soo baxay mar kale waddooyinka magaalada Nairobi ee xarunta dalka Kenya, inkastoo dowladdu ay ku dhawaaqday in dibadbaxyadu ay yihiin kuwo sharci-darro ah.
Hoggaamiyaha mucaaradka Raila Odinga ayaa ku biiray dibadbaxayaasha dhanka galbeed ee caasimadda halkaasoo kolonyadii uu la socday ay soo jiiteen kumannaan taageereyaal ah, waxaana uu kula hadlay goobo kala duwan oo uu ku baaqay in la helo caddaalad doorasho iyo in la dhimo qiimaha cuntada.
Booliisku waxay isticmaaleen sunta dadka ka ilmeysiisa si ay u kala eryaan taageerayaasha. Taliyaha booliska Japheth Koome ayaa ku adkeysanaya in mudaaharaadyadu ay yihiin kuwo sharci darro ah balse Odinga ayaa sheegay in dadka Kenyaanka ah ay xaq u leeyihiin in ay mudaaharaad sameeyaan.
Odinga iyo xisbigiisa, Azimio la Umoja–One Isbahaysiga Kenya, ayaa hogaaminaya mudaaharaadyada looga soo horjeedo sare u kaca maciishada waxayna ku baaqayaan in madaxweyne William Ruto uu is casilo isagoo sheegay in aan si sax ah loogu soo dooran doorashadii sanadkii hore.
In ka badan toban kooxood oo bulshada rayidka ah ayaa bayaan ay si wadajir ah u soo saareen ku muujiyay walaaca ay ka qabaan bilaysku inay ku dhawaaqaan mudaaharaadyada Isniinta mid sharci darro ah waxayna ku booriyeen mas’uuliyiinta inay ilaaliyaan xuquuqda dastuuriga ah ee dadku u leeyihiin mudaaharaad nabadeed.
Ruto ayaa dhamaadkii todobaadka ku booriyay Odinga in uu si toos ah u wajaho oo uu joojiyo dibed baxyada.
Odinga ayaa todobaadkii hore sheegay in mudaaharaadyada la qaban doono todobaadkii laba jeer, maalmaha Isniinta iyo Khamiista.
Qorshaha Odinga ee mudaaharaadyadii todobaadkii hore waxa uu ahaa in uu socod ku tago xafisyada madaxweynaha ee Aqalka Madaxtooyada balse boolisku waxay sameeyeen caqabado si ay uga hortagaan in ay dadweynaha galaan, darawalladana waxa loo jiheeyay wadooyin kale.
Madaxweyne Ruto ayaa hadda ka maqan dalka isagoo booqanaya Jarmalka.
Xarunta ganacsiga ee bartamaha Nairobi ayaa degan balse inta badan goobihii ganacsiga ayaa la xiray sababo la xiriira hubanti la’aanta ka dhalatay dibadbaxyada iyo haddii ay rabshado dhici karaan.
Waxaa jiray warar sheegaya in qaar ka mid ah rabshado loo geystay Odinga iyo taageerayaashiisa. Dadka qaar ayaa weerar ku qaaday beer ku taal duleedka caasimadda oo ay lahaayeen qoyska madaxweynihii hore ee dalka Uhuru Kenyatta, iyagoo jaray geedo iyo ido, sida ay sheegtay warbaahinta gudaha. Madaxweynihii hore ayaa taageeray Odinga doorashada 2022.
Meheradda wax soo saarka gaaska ee Odinga ee u dhow xarunta dhexe ee ganacsiga ayaa lagu tuuray dhagaxaan.
Booliska ayaa kala eryay dad isugu soo baxay Kibera iyo Mathare oo ah meelaha saboolka ah ee Nairobi.
Mid ka mid ah dadka deggan Kibera, Emily Atieno, ayaa u sheegtay wakaaladda wararka ee Associated Press inay sii wadi doonto mudaaharaadyada ilaa “qiimaha cuntada laga dhimayo”. Dibadbaxe kale oo Mario Omari ayaa sheegay in mudaaharaadyadu ay sii socon doonaan ilaa Ruto uu xilka iska casilo.
Warbaahinta maxalliga ah ayaa looga digay inay baahiyaan mudaaharaadyada Isniinta. Hay’adda Isgaarsiinta Kenya ayaa sheegtay in baahinta banaanbaxyadii todobaadkii hore ay keeneen argagax, kicin dadweyne iyo halis nabadeed.
Dibad-baxyada maanta ayaa yimid kadib markii mucaaradka ay wacad ku mareen inay sii wadi doonaan mudaaharaadyada inkasta oo booliska ay mamnuuceen.
Ammaanka ayaa aad loo adkeeyey, ayada oo booliska rabshadaha ka hortaga la dhigay baraha muhiimka ah ee Nairobi iyo waddooyinka, halka dukamo badan la xiray, lana hakiyey adeegyada tareenada ee duleedka magaalada.
Booliska ayay isku dhaceen dibad-baxyo tuuraya dhagxaan, isku raranta ugu weyn ee Nairobi ee Kibera, halkaasi oo dibad-baxayaasha ay ku gubeen taayaro.
Waxay ku gacan sayreen amarka dambi-baaraha guud ee booliska Japhet Koome, oo Axaddii sheegay in dibad-baxyada ay yihiin sharci-darro, lana mamnuuci doono.
Xaaladda ayaa deganeyd qeybaha kale ee magaalada, ayada oo boolis xooggan ay joogeen xaafadaha qaar oo ay ka dhaceen dibad-baxyadii toddobadkii tegay.
Isku dhacyadii Isniintii hore ee Nairobi iyo meelaha ay ku xooggan yihiin mucaaradka ay galbeedka Kenya, arday Jaamacadeed ayaa ku dhintay rasaasta booliska, halka 31 sarkaal la dhaawacay.
Xafiiska Shabakada Allbanaadir.com
Muqdisho Somalia
Allbanaadir@live.com
