Wasiirka Wasaaradda Dhallinyarada iyo Cayaaraha Somalia Mudane Xil. Maxamed Barre Maxamuud oo dalka dibaddiisa safar shaqo ugu maqan ayaa ka jawaabay baaqa Iglan Cabdullaahi Maxamed oo ah gabar Soomaaliyeed oo shaqo doona ah taasoo sheekadeeda iyo midda qowskeeda dareen taabadka lahayd lagu faafiyay baraha Bulshada.
Wasiirka ayaa amray waaxda shaqada iyo shaqaalaha ee Wasaaradda dhallinyarada iyo cayaaraha in la hawlgeliyo gabadhaas Soomaaliyeed oo lagu qoro boos darajada labaad (B) ee shaqaalaha Ku meel gaarka ah ee gunnada qaata, isagoo wasiirku ballan qaaday in muddo kooban gudaheed marka ay tababarrada dhamaysato loo dalacsiin doono darajada (A) oo ah heerka ugu sareeya ee shaqaalaha rayidka ah.
Wasiir Maxamed Barre Maxamuud ayaa sheegay inuu xil ka saaran yahay guud ahaan dhallinyarada Soomaaliyeed isagoo caddeeyay in awoodda wasaaradda ee wax ka qabashada shaqo la’aanta dhallinyaradu ay koobantahay laakiin kiiska Iglan oo dad badan dareenkooda dhaqaajiyay isla markaana masuul ka ah walaalaheed ka yar yar ay xil gooni ah iska saarayaan.
Iglan Cabdullaahi Maxamed iyo qowskeed ayaa ka mid ah dhibanayaasha weeraradii argagixiso ee dalka ka dhacay iyadoo ku wayday Waalid iyo walaal.
Xafiiska Shabakada Allbanaadir.com,
Muqdisho Somalia
Allbanaadir@live.com
