Degmada Doolow ee Gobolka Gedo waxaa soo gaaray boqolaal Ciidamo Itoobiyaan ah oo aan qeyb ka aheyn howlgalka Midowga Afrika ee ATMIS.
Madaxa hawlgalinta ciidanka militariga Itoobiya Gen. Tasfaye Ayalew, Taliyaha guud ee ciidanka Xoogga gaarka ee Dowlad Deegaanka Soomaalida iyo Saraakiil kale ayaa la sheegay iney horkacayaan Ciidamada soo gaaray Doolow oo ku taalla xadka labada dal.
ujeedada Ciidamada Itoobiya ee aan ka midka aheyn ATMIS loo soo geliyey Somalia ayaa lagu sheegay inuu yahay in layska kaashaado amniga Xuduudaha iyo sidii loo ciribtiri lahaa Al-Shabaab, waxaana Saraakiisha ay u sheegeen maamulka & odayaasha in ciidamo cusub oo howlgal ka sameyn doonaan deegaanada Jubbaland.
Ciidamo Itoobiyaan ah oo hor leh ayaa la filayaa inay dhawaan soo gaaraan Gobolka Gedo, iyaga oo saldhig ka sameysanaya magaalada Baardheere, kuwaasoo ka qeyb qaadan doona ka xoreynta Al-Shabaab deegaanada ay uga hareen gobolka Gedo iyo guud ahaan gobolka Jubadda Dhexe.
La taliyaha amniga Qaranka ee dowlada Somalia ayaa dhowaan sheegay inuu dhowaan bilaaban doono wejiga labaad ee howlgalka dalka looga saarayo Al-shabaab kaasoo uu sheegay iney ka qeyb qaadan doonaan ciidamo aan qeyb ka aheyn oo ka iman doona dalalka Kenya, Itoobiya iyo Jabuuti.
Xafiiska Shabakada Allbanaadir.com
Muqdisho Somalia
Allbanaadir@live.com
