Afhayeenka Al-Shabaab ee dhinaca ciidamada Cabdicasiis Abuu Muscab ayaa sheegay in howlgal nooc cusub ah ka bilaabi doonaan magaalada Muqdisho ee caasimada dalka.
Isagoo la hadlayey warbaahinta ku hadasha codka kooxdaas ayuu Abuu Muscab intaas ku daray in kooxda ay magaalada Muqdisho ka fulin doonto howlgallo ka dhan ah ciyaal weerada iyo kuwa ka ganacsada daroogada.
“Xoogageena ku sugan Muqdisho waxaan amar ku siinay inay tallaabo adag ka qaadaan ciyaal weerarada iyo kooxaha ka ganacsada daroogada noocyadeeda kala gedisan” ayuu yiri afhayeenka
Abuu Muscab ayaa digniin adag siiyey kooxaha ciyaal weerada iyo dadka maandooriyaha ka ganacsada.
“Dadka xumaantaas ku lug leh waxaan leenahay waan kaa war haynaa oo waan kugu soo soconnaa, waxaan kuugu baaqeynaa inaad ka towbad keentaan xumaanta aad faraha kula jirtaan inta aysan ku soo gaarin gacanta mujaahidiinta,” ayuu yiri Abuu Muscab.
Waxaa uu xusay in talaabadan ay jawaab u tahay cabashooyin badan oo uu sheegay in dadka Muqdisho u gudbiyeen kooxdiisa, kuwaasoo la xiriira halista ay kooxahaasi ku hayaan
“Sidoo kale waxaan u digeynaa goobaha habeenkii lagu caweeyo ee xumaanta iyo fisqiga lagu faafiyo” ayuu yiri Afhayeenka Al-Shabaab ee dhinaca ciidamada Cabdicasiis Abuu Muscab.
Xafiiska Shabakada Allbanaadir.com
Muqdisho Somalia
Allbanaadir@live.com
