Madaxweyneyaasha Kenya iyo Eritrea oo kulamo kala duwan maalmihii lasoo dhaafay ku lahaa magaalada Nairobi ayaa ku heshiiyay qodobo ay kamid yihiin sidii loo fudeyn lahaa socdaalka iyo xiriirka ganacsiga labada wadan ee Kenya iyo Eritrea.
Kenya iyo Eritrea ayaa ku heshiiyey inay si joogto ah meesha uga saaraan shuruudaha fiisaha ee muwaadiniintooda.
Talaabadan ayay ku macneeyeen inay kicin doonto isbadalka dhaqaale ee  labada dal
Hadalkan ayaa Khamiistii laga sheegay Aqalka Madaxtooyada ee magaalada Nairobi, markii Madaxweyne Ruto uu wadahadallo laba geesood ah la yeeshay dhiggiisa dalka Eritrea Isaias Afwerki.
“Waa in aan helnaa nidaam ka madax bannaan caqabadaha hortaagan is-dhexgalka dheeraadka ah, xoojinta xiriirka iyo kor u qaadista ganacsiga gobolka,” ayuu yiri madaxweyne Ruto.
Labada dal ayaa ku heshiiyey inuu jiro ganacsi iyo maalgashi aad u weyn oo u dhexeeya iyaga oo u baahan iskaashi habaysan.
Waxay soo qaateen tamarta la cusboonaysiin karo, maamulka biyaha, beeraha, gaadiidka, amniga, dalxiiska, macdanta ciyaaraha, dhaqaalaha buluuga ah iyo waxbarashada.
“Iyada oo la hawlgelinayo Aagga Ganacsiga Xorta ah ee Qaaradda Afrika, waa in aan iska kaashanaa sidii aan u samayn lahayn fursado dhaqaale oo dalalkeenna u dhexeeya.”ayuu yiri Madaxweyne Ruto
oo ammaanay sida ay Eritrea uga go’an tahay nabadda iyo xasilloonida gobolka.
Tani, ayuu Madaxweyne Ruto xusay, in ay dhabaha u xaarayso iskaashiga nabadda iyo horumarka gobolka.
Madaxweyne Afwerki ayaa sheegay in Eritrea ay ka go’an tahay in ay qaaddo tallaabooyin sahlaya sii xoojinta xiriirka dhaqaale, bulsho iyo dhaqan ee kala dhaxeeya Kenya.
“Waxaan sii wadi doonnaa horumarinta maalgashiga wadajirka ah, waxaana ka wada shaqeyn doonnaa sidii aan u wanaajin lahayn nabad iyo ammaan waarta,” ayuu yiri intii lagu jiray kulankooda warbaahinta wadajirka ah.
Dhinaca kale madaxweynaha Eritrea ayaa xaqiijiyay in dalkiisu uu mar kale dib ugu biiri doono urur goboleedka IGAD ee uu muddada 10-ka sano ka badan ka maqnaa.
Madaxweyne Afwerki oo muddo dheer ku jiray go’doon siyaasadeed ayaa haatan bilaabay dhaqdhaqaaqyo uu isku furfurayo si dalkiisa uu wax ula qeybsado dalalka kale ee gobolka.
Xafiiska Shabakada Allbanaadir.com
Muqdisho Somalia
Allbanaadir@live.com
