Madaxweyne Reccep Tayyib Erdogan ayaa arbacadii qirtay inuu dhibaato kala kulmay falcelintii ugu horeysay ee dowladiisa ay ka bixisay dhulgariir ba’an oo ku dhuftay koonfurta dalka Turkiga ka dib markii ay caroodeen dadka saboolka gaabiska ay ku yimaadeen kooxaha gurmadka.
Erdogan oo ka qayb-galaya doorashada bisha May, ayaa booqasho uu ku tagay aagga musiibada ka dhacday ayaa sheegay in hawlgalladu ay hadda si caadi ah u shaqaynayaan, waxaanu ballan-qaaday in aan cidina guri la’aan looga tegi doonin, iyadoo tirada dhimashada guud ahaan Turkiga iyo dalka deriska la ah ee Suuriya ay kor u dhaaftay 11,000 oo qof.
Laakiin guud ahaan dhul badan oo ku yaal koonfurta Turkiga, dadku waxay raadsadeen hoy iyo cunto ku meel gaar ah iyadoo cimilada ay aad u qabowdahay. Samatabbixiyeyaashu waxay wali qodayeen dad nool. Qaar kale ayaa meydkooda la helay.
Muuqaalo iyo cabashooyin la mid ah ayaa ka dhacay dalka deriska la ah ee Suuriya, halkaasoo saameynta dhulgariirkii weynaa ee Isniintii uu gaaray.
Dhimashada labada dal ayaa la filayey inay sii korodho iyadoo boqollaal dhisme oo ku dumay magaalooyin badan ay noqdeen xabaal ay ku aasan yihiin dadkii ku hurdayey guryaha markii dhulgariirku dhacay subaxnimadii hore.
Magaalada Antakya ee dalka Turkiga, tobanaan qof oo meyd ah, oo qaarkood ay huwan yihiin bustayaal iyo go’yaal, qaarna boorsooyin ay ku jiraan ayaa la soo dhigay bannaanka isbitaalka.
Qoysaska ku nool koonfurta Turkiga iyo Suuriya ayaa habeenkii labaad ku hoyday qabow baraf ah.
Qaar badan oo ka mid ah dadka aagga masiibada ka dhacday ayaa ku seexday baabuurtooda ama waddooyinka hoostooda, iyagoo ka baqaya inay dib ugu noqdaan dhismayaal uu waxyeelo u geystay dhulgariirka ah kii ugu dhimashada badnaa ee Turkiga ka dhaca tan iyo 1999.
“Aaway teendhooyinkii, aaway baabuurtii cuntada?” Melek, oo 64 jir ah, kuna sugan Antakya, ayaa sheegtay in aysan arag wax koox samatabbixin ah. “Waan ka badbaadnay dhulgariirka, laakiin waxaan halkan ugu dhiman doonnaa gaajo ama qabow halkan.”
Tirada dhimashada ayaa gaartay 8,574 dalka Turkiga Arbacadii. Suuriya – oo ay horeba u burburiyeen dagaal 11 sano socday – tirada la xaqiijiyay ayaa kor u kacday in ka badan 2,500, sida ay sheegeen dawladda iyo adeegga samatabbixinta ee ka hawlgala woqooyiga galbeed ee fallaagada gacanta ku hayso.
Magaalada Xalab ee dalka Suuriya, shaqaalaha cisbitaalka Al-Razi ayaa goob joog ka ahaa nin sheegay in ka badan 12 qof oo qaraabadiisa ah oo ay ku jiraan aabihiis iyo hooyadiis ay dhinteen markii dhismihii ay ku jireen uu soo dumay.
“Waxaan ahayn 16, 13 ka mid ah ayaa naga dhintay, walaalkay, aniga iyo ina-adeer oo jira hal sano iyo bar ayaan ka badbaaday, Allaa mahad leh,” ayuu yiri.
“Aabbahay, hooyaday, walaalkay, xaaskiisa iyo afar carruur ah oo ay dhaleen, xaaskii iyo laba carruur ah oo uu dhalay walaalkay ayaa iyaguna dhintay.”ayuu yiri
Xafiiska Shabakada Allbanaadir.com
Muqdisho Somalia
Allbanaadir@live.com
