Waxaa soo baxaya faahfaahino ku saabsan dagaal u dhaxeeyay ciidamada Dowladda iyo xooggaga deegaanka ee Macawisley oo is kaashanaya iyo kooxda Al-shabaab oo ka dhacay deegaanka Beer-xaanno ee Koonfurta Magaalada Beledweyne.
Dagaalka ayaa billowday markii ciidanka huwanta ay weerar ku qaadeen goob ay isku aruursanayeen xoogag Al-shabaab, waxaana labada dhinac halkaas ku dhexmaray dagaal culus oo hub kala duwan la issu adeegsaday.
Ciidan gurmad ah oo uu hoggaaminayo Taliye Xasan Guuleed oo ka mid ah saraakiisha guutada 5-aad qeybta 27-aad ayna wehliyaan ciidanka Gorgor ayaa gaaray goobta uu dagaalka ka socday.
Saraakiisha ciidamada dowladda ayaa Warbaahinta u sheegay in khasaare xooggan la gaarsiiyay Al-shabaab ayna ka saareen deegaano ay ka mid yihiin Beerxaano Dhoqor iyo kuwa kale oo dhammaantood dhaca Koonfurta Beledweyne.
Taliye Xasan Guuleed oo ka mid ah saraakiisha guutada 5-aad qeybta 27-aad ayaa sheegay in dagaalkaas ay ku laayeen 31 ka tirsan Al-shabaab hub fara badana ka furteen, isagoo xusay iney weli ku daba jiraan firxadka Al-shabaab sida uu yiri.
Ma Jiraan warar madax banaan oo xaqiijinaya ama beeninaya sheegashada taliyaha oo sidoo kale sheegau in khasaaraha soo gaaray ciidamada Huwanta uu kooban yahay.
Xafiiska Shabakada Allbanaadir.com
Muqdisho Somalia
Allbanaadir@live.com
