Ciidamada xoogga dalka oo kaashanaya dadka degaanka ayaa gabal dhicii maanta gaaray degmada Ceeldheer ee gobolka Galgaduud oo degaan ahaan uu ka soo jeedo Madaxweyne Xassan Shiikh Maxamuud.
Kooxda Al-Shabaab oo muddo fog ka talineysay degmada Ceeldheer ayaa ugu dambeyn baneeyey degmadaas, iyagoo aan dagaalamin.
Al-shabaab ayaa miinooyin ku aasay wadooyinka dhinaca Koonfureed ee laga soo galo degmada Ceeldheer, hase ahaatee ciidamada DF oo arrintaas ka war helay ayaa ka weecday jidadkaas, una wareegay dhinaca woqooyi oo ay haatan joogaan.
Wararku waxay sheegayaan in ciidamada huwanta aysan weli gudaha u gelin degmada Ceeldheer, ayna qorsheynayaan iney sameeyaan miino baar ka hor inta aysan gelin maalinta beri ah.
Inta badan dadka degaanka ayaa ka baxay degmada Ceeldheer ka dib markii ay sidaas ku qasbeen Al-shabaab sida ay sheegayaan saraakiisha ciidamada DF.
Al-Shabaab oo maanta sidoo kale lagala wareegay degmooyinka Galcad iyo Xarardheere oo ahaa fariisinkooda ugu weyn ayaa waxaa haatan gacantooda ku haray degmooyinka Ceelbuur, Â Galhareeri iyo tuulooyin yar yar.
Khubarada ciidamada ayaa sheegaya in Al-shabaab aysan sii joogi karin degaanadaas, ayna ku qasban yihiin iney ka baxaan ama isku dhiibaan ciidamada huwanta, marka la eego istaraatiijiyada dagaalka, waxayna degaanadaas haatan ku jiraan wax u eg go’doon.
Xafiiska Shabakada Allbanaadir.com
Muqdisho Somalia
Allbanaadir@live.com
