Dagaalo ayaa la soo sheegayaa iney caawa ka socdaan magaalada Laascaanood ee gobolka Sool oo todobaadyadii u dambeeyey ay ka jireen xiisado iyo dibedbaxyo rabshado wata.
Sida wararku nagu soo gaarayaan dagaalka caawa qarxay markii la Weeraray saldhigyo ciidamada Somaliland ku leeyihiin duleedka magaalada Laascaanood.
Rasaas xooggan ayaa laga maqlayaa qeybo badan oo ka mid ah gudaha magaalada, iyadoo xaalada magaalada ay caawa tahay mid cakiran, mana jiro wax isku socod ah dadka iyo gaadiidka intaba.
Madaxda Maamulada Somaliland iyo Puntland oo ku muransan magaaladaas ayaa maalmihii la soo dhaafay hawada isku marinayey hanjabaado kala duwan.
Goobjoogeyaal ayaa sheegaya in Jabhad hubaysan ay caawa gudaha u galeen Laascaanod iyagoo ku tilmaamay xaaaladda magaaalada mid ka duwan 10kii beri ee dagaalku ka socdey.
Wararka qaarkood ayaa sheegaya in dagaalkan uu bilowday caawa markii ciidanka Somaliland ay toogteen mid ka mid ah Shacabka Magaaalada Laascaanood.
Dagaalka oo u dhexeeya ciidamada Somaliland iyo dad shacab ah oo qoryahooda la soo baxay ayay wararka aan ka helayno sheegayaan inuu ka socdo waqooyiga magaaalada ee xigta Saldhiga Ciidanka Somaliland ee Goojacadde.
Weli lama oga khasaaraha dagaalka caawa hase ahaatee ugu yaraan 20 qof ayaa ku naf waayey dagaalo iyo rabashado 10 kii cisho ee la soo dhaafay ku dhexmaray magaalada Laascaanood ciidamada Somaliland iyo dadka degaanka oo ka cabanayey amni daro iyo dilal soo batay.
