Gaari weyn oo nuuca xamuulka qaada ah oo siday shixnad ayaa ku bareeg goostay Suuqa Bakaaraha ee Muqdisho gaar ahaan wadada Jid Mareexaan , waxaana shilkan ka dhashay khasaaro isugu jira dhimasho iyo dhaawac.
Goobjoogayaal ayaa ku waramay in darawalka gaariga waday uu mar qura bareeg ka waayay gaariga, waxa uuna dardaray gaarigaasi gaadiid kala duwan iyo mootooyin wadada socday iyo kuwa hareeraha marayay.
Inta la xaqiijiyay shilkaasi waxaa ku geeriyootay gabar ardayad aheyd oo lagu magacaabayay Najmo Cabdicasiis Cilmi oo kasoo baxday jaamacadda Soomaaliya ay dhiganeysay, waxaa sidoo kale shilka ku dhaawacmay dad ka badan 10-qof.
Dadka dhaawacmay oo loola cararay qaar kamid ah isbitaalada kuyaalla magaalada Muqdisho ayaa qaarkood la sheegay in ay qabeen dhaawacyo culus, waxaana goobta shilku ka dhacay gaaray oo baaris wada ciidamo katirsan booliiska Soomaaliya.
Shilkan ka dhacay Suuqa Bakaaraha ayaa noqday kii ugu xumaa ee muddooyinkan dhaw halkaasi ka dhaca, waxaana dadkii halkaasi ku sugnaa markii uu shilka dhacayay la kulmeen argagax iyo cabsi badan.
Xafiiska Shabakada Allbanaadir.com
Muqdisho Somalia
Allbanaadir@live.com
