Waxaa maalmihii lasoo dhaafay hakad galay howlgaladii ka dhanka ah kooxda Al Shabaab ee ka socday qaar kamid ah gobolada dalka, hakadka galay dagaalka ayaana la tilmaamay in fursad u tahay kooxda Al Shabaab oo jab kasoo gaaray dagaaladii dhacay.
Xildhibaan Maxamed Ibraahim Macalimuu ayaa sheegay hakadka ku yimid howlgaladii Al Shabaab dalka looga xureenayay uu fursad weyn siinayso kooxdaasi si ay uga soo kabtaan jabkii horey u gaaray ayna mar kale dib isugu soo uruursadaan.
”Hakad uu galo dagaalka ka dhanka ah Khawaarijta, waxeey siineysaa fursad ay dib isugu urursadaan, kadib jabkii cuslaa ee soo gaaray. Geeso lo’aad kuleylkaa lagu gooyaa” ayuu yiri Xildhibaan Macalimuu.
Howlgaladii ka socday gobolada Hiiraan, Shabeelaha Dhaxe iyo Galgaduud qeybo kamid ah ayaa hakad galay maalmihii lasoo dhaafay, mana jiro ilaa hadda war dowladda kasoo saartay hakadka ku yimid howlgaladii ka dhanka ahaa Al Shabaab.
Ciidamada dowladda iyo kuwa deegaanka ayaana howlgalkii ugu dambeeyay ku qabsaday deegaanka Wabxo ee gobolka Galgaduud, hasa ahaatee ciidamada huwanta ah ayaana deegaankaasi dib uga baxay labao maalin kaddib markii ay qabsadeen.
Xafiiska Shabakada Allbanaadir.com
Muqdisho Somalia
Allbanaadir@live.com
