(Sawirro) Gantaalo loo maleynayo inuu soo riday Ruushka oo ku dhacay dalka Poland

Labo qof ayaa ku dhintay qarax ka dhacay tuulo ku taal Poland oo u dhow xudduudda Ukraine sida ay sheegeen shaqaalaha dab-damiska, iyadoo Mareykanku sheegay inuu baarayo warar aan la xaqiijin oo sheegaya in qaraxa uu ka dhashay gantaalo habow ah oo ka yimid Ruushka.

Qaraxan ayaa dhacay ka dib markii Ruushku uu gantaalo ku garaacay magaalooyin ku yaala Ukraine, weeraro ay Kyiv ku sheegtay inay ahaayeen mowjadihii ugu cuslaa ee gantaalada ku dhawaad sagaal bilood. Qaarkood ayaa ku dhacay galbeedka magaalada Lviv, oo wax ka yar 80 km (49.7 mayl) u jirta soohdinta Poland.

Wakaaladda wararka ee AP oo soo xiganaysa sarkaal sare oo ka tirsan sirdoonka Maraykanka ayaa sheegtay in qaraxa ka dhacay tuulada Przewodow ee bariga Poland uu ka dhashay gantaalada Ruushka oo u gudbay dhanka Poland oo xubin ka ah isbahaysiga milatariga reer galbeedka ee NATO.

Wasaaradda difaaca ee Ruushka ayaa sheegtay in wax weerar ah aysan ka fulin bartilmaameedyada u dhow xudduudda Ukraine iyo Poland, sida ay ku warrantay wakaaladda wararka ee Inter FAX.

Magaalada Washington, Pentagon-ka ayaa sheegay in aysan xaqiijin karin in gantaalada Ruushka ay ku dhaceen dhulka Poland.

“Waan la soconaa wararka saxafada ah ee sheegaya in laba gantaal Ruushku ay ku dhufteen meel ku taal gudaha Poland oo u dhow xudduudda Ukraine, waxaan kuu sheegayaa in aanan hadda haynin wax macluumaad ah oo lagu xaqiijinayo wararkaas oo aan sii eegayno.” ayuu yiri Afhayeenka Pentagon-ka Brig. Gen. Patrick Ryder.

Raiisul wasaaraha Poland Mateusz Morawiecki ayaa ku baaqay shir deg deg ah oo ay isugu yimaadeen guddiga dowladda ee amniga qaranka iyo arrimaha difaaca, afhayeenka dowladda Piotr Muller ayaa sidaas ku sheegay bartiisa Twitter-ka.

Idaacadda ZET ee dalka Poland ayaa sheegtay in labo gantaal oo habow ah ay ku dhaceen tuulada Przewodow, halkaasoo ay ku dhinteen laba qof, iyadoo aan faahfaahin kale laga bixin.

Ruushka ayaa 110 gantaal iyo 10 diyaaradood oo Iran ay samaysay oo weerar ah ku qaaday Ukraine goor hore oo maqrib ah, sida ay bayaan ku sheegeen saraakiisha ciidamada qalabka sida ee Ukraine.

Madaxweynaha Ukraine Volodymyr Zelenskiy ayaa sheegay in bartilmaameedka ugu weyn ee gantaalada ay ahaayeen kaabayaasha tamarta.