Kooxo hubaysan ayaa goor dhow ku dilay isgoyska Baar Ubax degmada Howlwadaag ee magaalada Muqdisho laba nin oo ka mid ah darawalada gawaarida gaadiidka xamuulka ah ee ka shaqeeya Xamar iyo gobolada dhexe ee dalka.
Ragga dilka geystay oo ku hubeysnaa bastoolado ayaa la sheegay iney baxsadeen, iyadoo labada marxuumna isla goobta ku dhinteen.
Labada nin ee la dilay oo ka soo jeeda degmada Cadaado ayaa magacyadooda lagu kala sheegay Cabdi Seytuun Yuusuf iyo Kowte Faarax Jimcaale.
Lama illaa hadda sababta loo dilay iyo cida ka dambeysa inkastoo dilalka noocan ah looga bartay kooxda Al-shabaab oo haatan dagaal kula jirta beelaha dega gobolada dhexe.
Waa dilkii 3aad ee 24 saac gudahood ka dhaca magaalada Muqdisho, saaka ayey aheyd markii degmada dayniile lagu dilay Jeneraal Cabdullahi Xuseen Wardheere (Waran) oo ka tirsanaa Saraakiisha milatariga Soomaaliya, waxaana ka sii horeeyey dil sidoo kale xalay loo geystay Sheekh Cabdicaziiz Maxamed Xirsi, oo ahaa imaamkii masaajidka Dabaqeynka ee degmada Dharkenley.
Xafiiska Shabakada Allbanaadir.com
Muqdisho Somalia
Allbanaadir@live.com
