Madaxweynaha Puntland Mudane Siciid Cabdullaahi Deni, ayaa magaalada Nairobi kulan Kula qaatay Safiirka Dowladda Germany ee Soomaaliya Amb. Sebastian Groth.
Kulanka ayaa looga hadlay Iskaashiga Puntland iyo Dowladda Jarmalka iyo Doorashooyinka Hal qof iyo hal cod ee Goleyaasha Deegaanka degmooyinka Puntland.
Danjiraha Germany ayaa sheegay in dowladiisu diyaar u tahay inay Puntland ku taageerto Doorashooyinka dimuqraadiga ah ee la qaban-qaabinayo, ayna kaalinteeda ka qaadan doonto.
Madaxweynaha ayaa uga mahadceliyay Amb. Sebastian Groth iyo Dowladda Germany, taageerada iyo Iskaashiga ay la leeyihiin Soomaaliya gaar ahaan Puntland, sida Mashaariicda ay ka taageeraan Hay’adaha Dowladda Puntland iyo doorkooda ku aadan hannaanka Dimuqraadiyadda Puntland.
Madaxweynaha Puntland Mudane Siciid Cabdullaahi Deni ayaa booqasho ku jooga Nairobi maalmahan, wuxuuna taageero dhaqaale iyo mid siyaasadeed u raadinayaa qorshihiisa ku aadan inuu doorasho dadweyne ka qabto Puntland inkastoo siyaasiyiin iyo dad kale oo reer Puntland ay diidan yihiin. iyagoo qaba in Deni uusan daacad ka aheyn qorshahan, uuna ku hoos qarinayo muddo kororsi.
Xafiiska Shabakada Allbanaadir.com
Muqdisho Somalia
Allbanaadir@live.com
