Afar ka mid ah dhaawacyada qaraxyadii maalmo ka hor ka dhacay nawaaxiga isgoyska Soobe ee magaalada Muqdisho ayaa maanta laga duuliyey garoonka dayuuradaha Aadan cadde ka dib dayuurad ambalaas ah oo u soo dirtay dowlada Turkiga.
Dayuurada ayaa sidoo kale keentay Muqdisho dhaqaatiir Turki ah oo ku taqasusay daweynta dhaawacyada halista ah iyo jajabka kuwaasoo ka howlgeli doona magaalada Muqdisho si ay wax yga qabtaan dhaawacyada daadsan isbitaalada.
Wasiir Caafimaadka Somalia oo qoraal soo dhigay baraha bulshada ayaa si faahfaahsam uga waramay arrimahan kaasoo u qornaa sidatan:-
Waxaan garoonka diyaaradaha Muqdisho kusoo dhaweeyey dhaqaatiir u dhalatey Dalka Turkiga oo ay horey wasaaradda Caafimaadka u codsatey in loo soo diro Soomaaliya si ay uga qeyb qaataan gurmadka daweynta dadkii ku dhaawacmey Qaraxyadii Argagixiso ee 29-kii October ka dhacay isgoyska Zoobe ee Magaalada Muqdisho.
Waxaan horey u codsaney in halkii dhaawacyada la qaadi lahaa waqti dheer ka dib in badalkeeda dhaqaatiir taqasus u leh Kiisaska halista ah la keeno dalka taas oo fursad kale u ah in dhaqaatiirta Dalkeena ay hellaan qibrado ku filan oo bari looga maarmi karo kiis walba in dibadda loo qaado.
Afar kiis oo ay soo gudbiyeen Isbitaalka Erdogan Ex Digfeer ayaa lagu qaadey diyaarad Amblance ah oo ay soo direen dowladda aan walaalaha nahay ee Turkiga, Dowladda Soomaaliya ma aysan dalban dhaawacyo dibadda loo qaadayo taa badalkeedana waxay qaadatey go’aan ah in Dowladaha Walaalaha ah laga dalbado dhaqaatiir taqasus u leh Kiisaska u baahan in Dalka Dibaddiisa looqaado.
Waxaan u mahad celinayaa Dowladda turkiga oo dhaqaatiirtii ugu horeysey noosoo dirtey kadib baaqeenii ee ahaa in Soomaaliya loo soo diro khuburo Caafimaad oo taqasus u leh Qaliida Dadka gubtey iyo Kiisasta adag ee aan dalka waxba looga qaban karin.
Xafiiska Shabakada Allbanaadir.com
Muqdisho Somalia
Allbanaadir@live.com
