Dowlada Turkiga ayaa si kulul u cambaareysay qaraxyadii xooganaa ee maanta ka dhacay nawaaxiga isgoyska Zoope ee magaalada Muqdisho.
Waxaan si adag u cambaareyneynaa weerarradan argagaxisada ah, waxaana u rajeyneynaa in Allaha u naxariisto intii ku geeriyootay, waxaan tacsi u direynaa eheladii iyo qaraabadii iyo sidoo kale shacabka saaxiibada iyo walaalaha ah iyo dowladda Soomaaliya, waxaana u rajeyneynaa caafimaad degdeg ah dhaawacmay” ayaa lagu yiri qoraal ka soo baxay Wasaarada arrimaha dibeda ee Turkiga.
Qoraalka ayaa lagu sheegay in dowlada Turkigu ka xun tahay khasaaraha ka dhashay qaraxyadaas.
“Waxaan aad uga xunahay markii aan ogaanay in dad badan ay ku naf waayeen kuna dhaawacmeen weeraradii argagixiso ee maanta (29 October) ka dhacay magaalada Muqdisho ee dalka Soomaaliya. Dhaawacyada qaar ayaa lagu daweynayaa Isbitaalka Tababarka iyo Cilmi baarista Recep Tayyip Erdoğan ee magaalada Muqdisho” ayaa lagu soo gebagebeeyey.
Dhinaca kale Qaramada Midoobay ayaa iyana si kulul cambaareysay qaraxyadan khasaaraha badan dhaliyey.
“Bahda Qaramada Midoobay waxay si kulul u cambaaraynaysaa weerarkii bahalnimada ahaa ee Al-shabaab ay maanta ka geysteen meel u dhow isgooyska KM-5 ee Muqdisho. Waxaan tacsi u direynaa bahdu qoysaska dhibanayaasha, waxeyna u rajaynaysaa caafimaad degdeg ah kuwa ku dhaawacmay weerarkaa, iyadoo si buuxda uga taageereysa dhammaan shacabka Soomaaliyeed ka hortagga argagixisada” ayaa lagu yiri qoraal kooban oo ka soo baxay xafiiska QM ee Somalia.
HOOS KA AKHRISO QORAALKA WASAARADA ARRIMAHA DIBEDA EE TURKIGA
Xafiiska Shabakada Allbanaadir.com
Muqdisho Somalia
Allbanaadir@live.com
