Ra’iisul Wasaarihii hore ee dalka Pakistan Imran Khan ayaa wajahaya dagaal siyaasadeed uga imaanaya xubno sar sare oo dowladda katirsan, waxaana siyaasigan lagu riday xukun saameyn ku yeelanaya mustaqbalkiisa siyaasadeed.
Imran Khan ayaa lagu eedeeyay in uu marin habaabiyay sidoo kale qariyay hadiyado qaali ah uu helay intii uu xilka hayay , waxaana baaritaano lagu sameeyay lagu ogaaday in ay jiraan hadiyado dhoor ah uusan soo bandhigin uuna qarsaday.
Guddiga doorashada dalka Pakistan ayaa shaaciyay in Imran Khan uu qariyay sidoo kale uu mas’uuliyiinta ka marin habaabiyey hadiyado uu ka helay hoggaamiyeyaal shisheeye intii uu xafiiska joogay.
Maxkamad kutaalla dalka Pakistan ayaana Imran Khan ka mamnuucday in xil sare u tartamo muddo shan sanno ah, waxaana xukunkan loo cugsaday musuqmaasuq lagu eedeeyay in uu ku kacay iyo hadiyado magacada dowladda uu ku helay uu qarsaday.
Gohar Khan, oo kamid ah qareenada Ra’isul Wasaare hore Imran Khan ayaa sheegay in guddiga doorashada kusoo eedeeyeen Khan in uu ku kacay fal musuqmaasuq ah, waxa uuna xusay in kiiskooda u gudbinayaan maxkamadda sare.
Ra’isul Wasaarihii hore ee dalka Pakistan Imran Khan iyo xaaskiisa ayaa marar badan lagu eedeeyay in ay qarsadeen hadiyado qaali ah ay ka heleen madax kala duwan ,kuwaa ay kamid yihiin saacado qaali ah, dahab, boorso gacmeedyo iyo barfuuno.
Dalka Pakistan waxaa ka jirta waax dowladda katirsan oo qaabilsan in lagu wareejiyo soona bandhigto hadiyada madaxda sare helaan, waxaana madaxda qasab ah in ay soo bandhigaan hadiyadaha qiimaha sare ku fadhiya.
Xafiiska Shabakada Allbanaadir.com
Muqdisho Somalia
Allbanaadir@live.com
