Waxaa maanta Maxkamadda Derejada koobaad ee ciidamada qalabka sida lasoo taagay labo nin oo la sheegay in ay katirsan yihiin saraakiisha sar sare ee kooxda daacish faraceeda Soomaaliya.
Maxkamada ayaa sheegtay in ragan oo kala ah Mahad Max’ud Cabdi oo Magacyadiisa Af-garashada yihiin (Abtidoon, Abuu-yaasiin) iyo Max’ed Daa’uud Daahir Warsame oo isagana loo yaqaanno (Dr,raage) ay xubno ka yihiin kooxda Daacish
Mahad Max’ud Cabdi ayaa maxkamada ciidamada ku eedeesay in uu waday qorshe uu ku aas aasayo garab kale oo Daacish katirsan kana madax banaan Daacishta uu hogaamiyo Sheekh Cabuqaadir Muumin oo ku sugan deegaanada Puntland.
Maxkamada ayaa sheegtay in Mahad Max’ud Cabdi uu ka yimid dalka Ruushka uuna heesto dhalashada dalkaasi, waxa ay sidoo kale Maxkamada sheegtay in Mahad uu waqti badan kusoo qaatay dalka Siiriya.
Wax yaabaha gaarka ah oo ay xafiiska xeer ilaalinta soo bandhigeen waxaa ka mid ah warqad uu u qoray hogaamiyaha ugu sarreeyo kooxda Daacish, taasi oo uu ku gudbinaya cabashada ay ka wadaan Cabduqaadir Muumin oo hogaamiya Daacishta Soomaaliya.
Dhinaca kale Max’d Daa’uud Daahir Warsame, oo Magiciisa Af-garashada yahay (Dr,raage) ayaa isna lagu eedeeyay in uu ahaa madaxa maaliyadda kooxda, sidoo kale ahaa caawiye xagga caafimaadka ah ayaa cadeymaha Maxkamadda lala keenay waxaa ka mid ahaa Akoonada Lacageed ee uu isticmaalay iyo shirakidihii uu ka isticmaali jiray Lacagaha.
Farsoomyinka ay ka mid yihiin kala badalidda xawaaladaha, Sameynta akoonno kala duwan oo loo sameeyay qaab-caawimaad iyo iska daba wareejinta sharikadaha in uu cadeeyo Hey’adaha uu sheeganayo shaqadooda iyo sharciyadda ay ku shaqeeyeen balse uu arrintaasi ah ka leex-leexday.
Ku xigeenka xeer ilaaliyaha Ciidamada qalabka Sida Dhamme Muumin Xuseen Cabdullaahi ayaa maxkamdda ka codsaday in la mar-siiyo ciqaab u dhiganto qodobada ay ku soo eedeeyeen, waxa uuna Maxkamadda ka codsaday in dil-toogasha ah.
Qareenada u doodayay eedeysanayaasha ayaa maxkamadda ka hor sheegay in aysan wakiiladooda diidaneyn ka mid ahaanshiyaha kooxda Daacish balse ay ka laabteen fikirkaas, sida mid ka mid ah qoraalkiisa cadeymaha uu ku cadeeyay hor-joogayaashan.
Guddoomiyaha Maxkamadda Darajada koobaad ee Ciidamada Qalabka Sida G/sare Xasan Cali Nuur Shuute ayaa soo xiray fadhiga Maxkamadda, waxa uuna u sheegay dhammaan ka qeyb-galayaasha in Maxkamadda ay go’aanka dib ka soo saari doonaan.
Xafiiska Shabakada Allbanaadir.com
Muqdisho Somalia
Allbanaadir@live.com
