Ra’isul Wasaaraha Xukuumada Soomaaliya Xasan Cali Kheyre ayaa markii xilka loo magacaabay waxyaabihii ugu muhiimsanaa uu balan qaaday in Xukuumadiisa wax ka qabaneyso waxaa kamid ahaa la dagaalanka Musuq Maasuqa iyo eexda.
Xukuumada Kheyre ayaa bilowday dadaalo lagu dhimayay Musuq maasuqa hareeyay Hay’adaha dowlada, waxaana mudooyinkii dambe yaraaday musuq maasuqii xooganaa ee Hay’adaha dowlada ka dhax jiray.
Ra’isul Wasaaraha Soomaaliya ayaa marar badan ku celiyay in ay ka go’antahay in la dagaalamaan Musuq maasuqa tilaabo adagna ay ka qaadi doonaan cidii ay ku arkaan musuq maasuq iyo ku takri fal awoodeyd.
Masuuliyiin katirsan Dowlada Soomaaliya ayaa shaqooyin kala duwan laga eryay kuwana waa la xiray kuwaa oo dhamaan lagu soo eedeeyay musuq maasuq, waxaana wali socda dagaal ay Xukuumada uga hortageyso Musuq maasuqa.
Xukuumada Soomaaliya ayaa hada si toos ah u bilowday dagaal ka dhan ah Musuq maasuq, waxaana baaris lagu wadaa xubno badan oo katirsan dowlada gaar ahaan agaasimayaal lagu eedeeyay Musuq Maasuq.
Ciidamo katirsan dowlada ayaa xalay gurigiisa kala baxay Agaaasimihii Waaxda Dib u dejinta barakacayaasha ee Wasaarada Gar gaarka Daahir Maxamed Nuur, waxaana masuulkan lagu eedeeyay in uu lunsaday lacag ku dhaw boqol kun oo Dollar.
Xukuumada Soomaaliya ayaa amar ku bixisay in sharciga la horkeeno cid kasta oo sameysa musuq maasuq, waxaana dhawaan marka uu Baarlamaanka furmo la filayaa in la horgeeyo sharciga Musuq maasuqa.
Xariga xalay loo geestay Agaasimahan katirsan Wasaarada Gar gaarka ayaa cabsi badan ku beeray agaasimayaal iyo masuuliyiin kale oo iyana sameeyay Musuq maasuq, waxaana suurto gal ah in xubnahaasi iyana la baaro loona xiro musuq maasuqa.
Dowlada Soomaaliya ayaa dadaalo badan ku bixisay sidii loo yareyn lahaa Musuq maasuqa dalka ka jira, waxa ayna Soomaaliya safka hore kaga jirtaa wadamada ugu musuq maasuqa badan Caalamka.
Xafiiska Shabakada Allbanaadir.com
Muqdisho Somalia
Allbanaadir@live.com
