Ra'isul Wasaare Xamse oo ka hadlay Dab Khasaaro geestay oo ka kacay Suuqa Kismaayo (Sawirro)

Dab geestay khasaaro badan oo hantiyadeed ayaa xalay ka kacay qeyb kamid ah Suuqa weyn ee magaalada Kismaayo ee xarunta KMG ee Jubbaland, gaar ahaan qeybta lagu iibiyo laguna keydiyo shidaalka.

Ciidanka dab demiska Jubaland iyo qaybaha kala duwan ee bulshada Kismaayo ayaa dadaal badan kaddib ku guuleestay in ay damiyaan dabka, waxaana dabkan uu bas beeliyay bakhaaro shidaal badan ku keydsanaayeen iyo dhismayaal kale oo ganacsi.

Ra’isul Wasaaraha xukuumadda Soomaaliya Xamse Cabdi Barre ayaa murugada la qeybsaday ganacsatadii iyo dadkii kale ee ku hanti beelay dadbkii xooganaa ee xalay ka kacay suuqa Kismaayo.

”Waxaan murugada iyo xanuunka la qeybsanayaa dadka shacabka ah ee hantidooda ku wayay musiibada ka dhacday suuqa ugu weyn ee Kismaayo, Waxaana Alle uga baryayaa inuu badal khayr qaba ka siiyo hantida ay ku wayeen dabkaas.” ayuu yiri Xamse Barre.

Maamulka Jubbaland ayaa la filayaa in guddi u saaraan baarista iyo qiimeynta khasaaraha ka dhashay dabka xooggan ee xalay ka kacay qeybo kamid ah suuqa Kismaayo, dabkan ayaana la sheegay in uusan geesan khasaaro nafeed marka laga reebo mida maaliyadeed.