Madaxweynaha dowladda federaalka Soomaaliya Xasan Sheekh Maxamuud oo ku sugan magaalada Adis Ababa ee caasimadda dalka Itoobiya, ayaa kulan arrimo badan looga hadlay la yeeshay Ra’isul Wasaaraha Itoobiya Abiy Axmed.
Kulanka labada masuul dhax maray ayaa inta badan looga hadlay xoojinta xiriirka labada dal ee muddooyinkii dambe xumaaday iyo sidii labada dal mar kale isaga kaashan lahaayeen dhinacyada amniga iyo ganacsia.
Madaxweyne Xasan Sheekh ayaa wararku sheegayaan in Ra’isul Wasaaraha Itoobiya ka codsaday in uu gacan ka siiyo dagaalka ka dhanka ah Al Shabaab, waxa uuna ka codsaday hub iyo saanad ciidan oo lagula dagaalamo Al Shabaab.
Wasiiru dowlaha arrimaha dibadda Soomaaliya Cali Maxamed Cumar (Cali Balcad) oo kamid ah wafdiga la socda Xasan Sheekh ayaa sheegay in Madaxweynaha ka codsaday Abiy Axmed hub iyo saanad ciidan oo lagula dagaalamo Al Shabaab.
“Madaxweynuhu wuxuu ku baaqay dagaal, shacabka oo ka jawaabaya baaqiisa ayaa hubka qaatay, hadda madaxweynuhu wuxuu dalka Itoobiya ka raadinayaa kaalmo dhanka dagaalka ah, Itoobiya waxay ka mid tahay wadamada hubka sameeya,” ayuu yiri Wasiir Cali Balcad.
Madaxweynaha Soomaaliya Xasan Sheekh ayaa doonaya in uu wanaajiyo xiriirka kala dhaxeeya Soomaaliya Itoobiya, si ay uga taageerto dagaalka ka dhanka ah Al Shabaab ee hadda ka bilowday qeybo dalka kamid ah.
Xafiiska Shabakada Allbanaadir.com
Muqdisho Somalia
Allbanaadir@live.com
