Maxkamadda sare ee Kenya ayaa ku amartay Guddiga Madaxa bannaan ee Doorashooyinka inuu u fasaxo wakiillada xisbiga murashaxa Madaxweynaha Kenya, Raila Odinga, inay kormeer ku sameeyaan xog-keydiyeyasaha kombiyuutarrada loo isticmaalay gudbinta tirinta codadka iyo keydintooda.
Maxkamaddu waxay sidoo kale amartay in muddo 48 saac gudahood ah baaris iyo dib-u-tirin lagu sameeyo 15 xarun cod-bixin, taasoo qeyb ka ah diidmada uu doorashada ka gudbiyay Odinga
Guddoomiyaha Maxkamadda, Martha Koome ayaa fartay madaxa booliska inuu si wanaagsan u sugo amniga wakiillada inta ay socoto howsha kormeerka oo ka dhici doonta meel aan la shaacin.
Dhegeysi hordhac ah ayay maxkamaddu sameysay maanta, waxayna waqtiyaysay dhegeysiga doodaha xisbi kasta iyo wakiillada.
Odinga ayaa diiday natiijada doorashada, isagoo sheegay in ku dhawaaqista in uu xilka ku guuleystay Ruto ay ahayd mid sharci-darro ah, taasoo uu u cuskaday kala qeybsanaanta guddiga doorashada
Wafula Chebukati oo ah Guddoomiyaha Guddiga Doorashada ayaa shaaciyay in Madaxweyne ku-xigeenka William Ruto uu ku guulaystay doorashadii la qabtay 9-kii Agoosto.
