Ugu yaraan 900 oo qof ayaa ku dhintay dalka Pakistan, iyadoo roobab xooggan oo sababay daadad ay ku dhufteen qeybo badan oo ka tirsan dalkaasi.
Dhibanayaasha ayaa badankood ka soo jeeda Waqooyi Galbeed ee gobolka Khaybar, halkaas oo mas’uuliyiintu ay soo aareen digniino hor leh.
Webiga Kabul ayaa qararka jabsaday, isagoo cagta mariyay guryo iyo hoteello. Dadka ku nool degmooyinka qaar ayaana lagu wargeliyay inay meelo kale oo ammaan ah u guuraan.
Ku dhowaad kun qof ayaa ku dhintay roobabka iyo daadadka tan iyo bishii June dowladda ayaana halkaasi ku daad gureyneysa ciidamo caawiya saraakiisha gudaha ee ka shaqeynaya howlaha samata bixinta.
Daadadka ayaa sii xumeeyay dhibaatada dhaqaale ee Pakistan. Ra’iisul Wasaare Shehbaz Sharif ayaa Arbacadii soo saaray codsi ka yimid dibadda, isagoo ku booriyay samafalayaasha inay caawiyaan meelaha ay fatahaaduhu saameeyeen ee Pakistan.
Ka dib markii ay qarqiyeen inta badan koonfur-galbeed ee Balochistan iyo bariga gobolka Punjab, daadad xooggan ayaa sidoo kale saameeyay koonfurta gobolka Sindh. Maamulka ayaa todobaadkan xiray iskuulada Sindh iyo Balochistan.
Roobabka monsoon, oo billowday bartamihii bishii June, ayaa la filayay inay sii socdaan toddobaadkan, gaar ahaan koonfurta.
Murad Ali Shah, oo ah masuulka ugu sareeya ee laga soo doorto gobolka Sindh, ayaa sheegay in xaaladdu ay aad uga liidato tii sanadkii 2010-kii, markaasoo daadad ay ku dhinteen ugu yaraan 1,700 oo qof kuwaasoo u badnaa Sindh. “Waxaan ku dadaaleynaa inaan dadka ka saarno meelaha daadadku ku dhufteen,” ayuu yiri Talaadadii.
Daadad ayaa waxa ay waxyeelo gaarsiiyeen ilaa 129 buundo oo ku yaala dalka Pakistan, waxa ayna hakad galiyeen qudaarta waxana ay sababtay in uu kordho qiimihiisu.
Saynisyahan Shahla Gondal ayaa u sheegtay wakaalada wararka ee Associated Press in Tobaneeyadii sano ee la soo dhaafay, waligood aysan arag roobab sidaan oo kale ah oo aan caadi ahayn oo ka da’aya Pakistan.
