Rasaastii iyo qaraxyadii laga maqlayay gudaha hotelka Xayaat ee Muqdisho ayaa saakay joogsaday , waxaana dhismaha Hotelka qeybo kamid ah ku sugan oo howlgalo kawada ciidanka dowladda Soomaaliya.
Ciidamada dowladda ayaa xalay duqeyn culus ku garaacay dhismaha hotelka Xayaat oo laga saari waayay dagaalyahanadii Al Shabaab ee weerarka ku galay, waxaana ciidanka duqeyntaasi ugu tala galeen in weerarka kusoo afjaraan.
Saraakiil katirsan ciidanka dowladda oo si hoose warbaahinta ula hadlay ayaa sheegay in lasoo afjaray weerarkii kasocday hotelka Xayaat, waxa ayna saraakiishan sheegeen in la dilay dhammaan ragii katirsanaa Al Shabaab ee hotelka ku jiray.
Ciidamada dowladda ayaana saakay ku sugan qeybo badan oo kamid ah dhismaha Hotelka, waxa ayna ciidamaa halkaasi ka baarayaan waxyaabaha qarxa iyo sidoo kale meydad halkaasi ku dhax jira.
Dowladda Soomaaliya ayaan wali si rasmi ah uga hadlin weerarkan la sheegay in lasoo afjaray, sidoo kale laamaha ammaanka dowladda ayaana shaacin khasaaraha dhimasho iyo midka dhaawac ee ka dhashay weerarka.
Weerarkan ayaa noqday kii ugu waqtiga dheeraa ee ka dhaca magaalada Muqdisho, waxaana ciidanka dowladda lagu amray in gabi ahaan burburiyaan dhismaha Hotelka si weerarka oo qaatay in ka badan 24-saac loo soo afjaro.
Xafiiska Shabakada Allbanaadir.com
Muqdisho Somalia
Allbanaadir@live.com
