Waxaa saakay baaqday kulan horey u iclaamiyeen guddoonka golaha shacabka ee baarlamaanka federaalka, oo saakay oo sabti ah lagu waday in ay Xildhibaanada ku yeeshaan xaruntooda Villa Hargeysa.
Kulankan baaqday ayaa lagu waday in maanta xarunta golaha shacabka ku tago Madaxweynihii hore ee Soomaaliya Maxamed Cabdullaahi Farmaajo, si loogu dhaariyo xubin sharafeed katirsan golaha shacabka.
Qoraal kasoo baxay guddoonka golaha shacabka ayaa lagu sheegay in uu baaqday kulankii maanta lagu waday in uu dhaco, waxaana guddoonka sheegeen in kulankan beri oo axad ah qabsoomi doono.
”Waxaa dib loo dhigay kulankii maanta ee Xildhibaanada Golaha shacabka BJFS ay ku balansanaayeen, kulanka ayaa la qabandoonaa maalinta berri ah oo ay taariikhdu tahay 21 August” sida lagu sheegay qoraal kasoo baxay Xafiiska Guddoomiyaha Golaha shacabka.
Xildhibaanada golaha shacabka ayaan wax kulan ah yeelan tan iyo markii ay ansixiyeen xukuumadda Ra’isul Wasaare Xamse Barre, waxaana xildhibaanada la filayaa in kulankooda ugu horeeyo ku doortaan guddoonka guddiyada loo qeybiyay xildhibaanada.
Xafiiska Shabakada Allbanaadir.com
Muqdisho Somalia
Allbanaadir@live.com
