Madaxweynaha Hirshabeelle Mudane Cali Guudlaawe Xuseen iyo wafdi uu hogaaminayo ayaa maanta gaaray Degmada Buulo Burde ee gobolka Hiiraan halkaasoo si diiran loogu soo dhoweeyay.
Madaxweynaha waxaa garoonka diyaaraha ee Magaalada Buulo Burde kusoo dhoweeyay Madaxweyne Ku Xigeenka Dowladda Hirshabeelle Mudane Yuusuf Axmed Hagar oo shalay gaaray halkaas, Xubnaha labada gole ee maamulka, Saraakiisha Hay’addaha Amaanka iyo Qeybaha kala duwan ee bulshada.
Cali Guudlaawe ayaa inta uu ku sugan yahay Magaalada Buulo Burde waxa uu kulamo la qaadan doona waxgaradka iyo qeybaha kala duwan ee bulshada Degmada.
Dhanka kale Madaxweynaha iyo Madaxweyne Ku Xigeenka ayaa xoojin doona howlgalada ka dhanka ah al-shabaab ee ka socda degmooyinka Maxaas iyo Matabaan.
Degmada Buulo burde ee gobolka Hiiraan ayaa waxaa muddo sanado ah go’doon ku haya Al-shabaab oo ka xirtay waddooyinka gala degmadaas iney gudbaan gaadiidka sida badeecadaha daruuriga ah taasoo saameyn adag ku yeelatay nolosha shacabka degmadaas.
