Madaxweynaha Puntland Mudane Siciid Cabdullaahi Deni, ayaa caawa aqalka Madaxtooyada kulan kula qaatay Bulshada rayidka ah, Guddiga Doorashooyinka Puntland, Wasiirada Arrimaha Gudaha iyo Tamarta, Macdanta iyo Biyaha.
Ujeedka kulanka ayaa daaranaa dardargelinta hanaanka Doorashooyinka Puntland ee hal qof iyo hal cod iyo sidii loo dhamaystiri lahaa Golaha degaanka inta ka hartay.
Guddoomiyaha Guddiga KGM Doorashooyinka Dowladda Puntland, Cabdirisaaq Axmed Siciid, ayaa Madaxweynaha & Bulshada rayidka ah la wadaagay warbixin guud oo ku saabsan halka ay marayso shaqadda Guddiga Doorashooyinka waxaana uu madasha kusoo bandhigay warbixin dhameystiran taas oo iskugu jirta waxqabadka Guddiga, qorayaasha, iyo fursadaha hada ee ku aadan sida dadka reer Puntland diyaar ugu yihiin hanaanka asxaabta badan.
Dowladda Puntland waxaa ka go’an hirgelinta hanaanka Dimuqraadiyeynta Dowladda Puntland ee hal qof & hal cod, sanadkii tagay ayaa waxaa lagu guulaystay hirgelinta iskudaygii kowaad ee tijaabada 3 degmo taas oo dad waynuhu soo doorteen Xildhibaanada Goleyaasha deegaanka ee degmooyinka Eyl, Qardho iyo Ufayn, dhamaadka sanadkan waxa dhammaan degmooyinka Puntland laga qaban doona doorashada Goleyaasha deegaanka ee dhammaan degmooyinka DPL, Guddiga ayaa dhawaan bilaabi doona diiwaan gelinta dadweynaha waxaana hada si habsami leh uga socota wacyiglinta dhammaan gobolada iyo degmooyinka Puntland.
Ugu danbeyntii Madaxweynaha Dowladda Puntland Mudane Siciid Cabdullaahi Deni, ayaa dhegaystay aragtida Ururada Bulshada cawa madasha ka qayb-galay sida kale waxa uu sheegay in Dowladda Puntland ay ka go’an tahay hirgelinta hannaanka Puntland u guurtay ee shacabku ku soo dooranayaan Madaxdooda.
