Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo oo horey marti qaad u fidiyey wiil Soomaali ah oo ku nool dalka Maraykanka oo ku guuleystay tartanka Quraanka Kariimka ah ayaa kulan kula qaatay Madaxtooyada Qaranka.
Kulanka oo ka dhacay xarunta Madaxtooyada Qaranka waxaa madaxweynaha ku wehlinayey aabaha dhalay Axmed Burhaan Maxamed, macalinkiisa iyo Markazka Abubakar Sadiiq ee Minessota.
Waxaa sidoo kale ku wheliyay masuuliyiinta Hay’adda culumada Soomaaliyeed iyo dalladaha culumada iyo sidoo kale Wasiirka Warfaafinta Xukuumadda Soomaaliya Mudane Daahir Maxamuud Geelle.
Axmed Burhaan Maxamed ayaa ku guuleystay abaalmarinta Dubai ee caalamiga ah, isagoo ka guuleystay in ka badan 100 qof oo adduunka ka kala yimid, kuna tartameyey Quraanka Kareemka ah
Madaxweynaha dalka ayaa Axmed oo 17 jir ah ugu hambalyeeyey guushii uu gaaray isagoo ku bogaadiyey in dadaalkiisa uu halkaasi kasii wado.
Axmed Burhaan Maxamed ayaa dhinaciisa sheegay inuu ku faraxsanyahay sida qiimaha badan ee uu u casuumay madaxweynaha dalka, isagoo sheegay in casuumadda loo sameeyey niyadiisa ay ku beertay farxad aan lasoo koobi karin.
“Waa wax aad u farxad badan, ma aanan fileynin. Waxay iiga dhigantahay maamuus iyo ixtiraam aad u badan.”ayuu yiri Maxamed.
Madaxweyne Maxamed Cabdullaahi Farmaajo ayaa tan iyo xilka inta uu qabtay waxa uu maamuus iyo marti qaad u sameeyey qaar ka mid ah dadka hal abuurka leh sida abwaanno,qorayaal, ciyaartooy farshaxanaystayaal, iyo dhallinyaro kaalimaha hore ka galay tartannada Quraanka Kareemka ah.
Xafiiska Shabakada Allbanaadir.com
Muqdisho Somalia
Allbanaadir@live.com
