War saxaafadeed wadajir ah oo goordhaw kasoo baxay wakiiladda beesha caalamka ayaa looga hadlay doorashada Aqalka Sare ee shalay ka dhacday Muqdisho iyo khilaafka hareeyay doorashada guddoonka gollaha shacabka oo maanta lagu wado in ay dhacdo.
Wakiiladda beesha caalamka u jooga Soomaaliya ayaa si diiran usoo dhaweeyay doorashadii shalay ka dhacday teendhada Afisiyooni ee lagu doortay guddoomiyaha Aqalka Sare iyo labadiisa kuxigeen.
War saxaafadeedka kasoo baxay wakiiladda beesha caalamka ayaa lagu booriyay madaxda Soomaalida in geeddi-socodka doorashada lagu soo gababageeyo si nabdoon lagana fogaado waxkasta oo abuuri kara dib u dhac.
”Kadib dib-u-dhacii dheeraa ee uu lasoo kulmay geeddi-socodka doorashada Soomaaliya, waa in aan loo oggolaan xiisadaha siyaasadeed iyo dhacdooyinka amni inay carqaladeeyaan marxaladda ugu dambeysa ee geeddi-socodka. Waxaan ku boorineynaa dhammaan madaxda Soomaaliyeed inay is-xakameeyaan, khilaafaadkana ay ku xalliyaan isu-tanaasul, kana fogaadaan sii hurinta dhacdo kasta. Arrinta ay Soomaaliya sida degdega ah diiradda u saarayso waa inay ahaato sidii si deggan oo lagu kalsoonaan karo loogusoo gabagabayn lahaa geeddi-socodka doorashada, si markaasi madaxda sida saxda ah loo soo doortay ay wax uga qabtaan arrimaha hortabinta u leh qaranka.” ayaa lagu yiri qoraalka beesha caalamka.
Warkan kasoo baxay beesha Caalamka u jooga Soomaaliya ayaa imaanaya xilli khilaaf ka jiro doorashada guddoonka gollaha shacabka oo manata lagu wado in ay ka dhacdo teendhada Afisiyooni, khilaafka ayaana salka ku haya xildhibaanada lagu doortay Gedo.
Xafiiska Shabakada Allbanaadir.com
Muqdisho Somalia
Allbanaadir@live.com
