Warar soo baxay ayaa sheegaya in diyaaradaha qumaatiga u kaca ee Ukraine ay burburiyeen xarun shidaal oo ku taal degaanka Belgorod ee gudaha Ruushka, taasoo noqonaysa duqeyntii ugu horeysay ee ciidamada dalkaas ku qaadaan dhulka Ruushka tan iyo markii uu dagaalka bilowday.
Guddoomiyaha gobolka Vyacheslav Gladkov ayaa sheegay in diyaaraddo joog hoose ku socda oo ka soo  gudubtay xadka Ukraine ay fuliyeen weerarkaas, waxaana dabka ka dhashay duqeyntaas ku dhaawacmay laba qof oo shaqaale ah.
Waxa uu intaasi ku daray in qaar ka mid ah xaafadaha magaalada laga daad gureynayo shacabka weerarka kadib.
Muuqaal la soo galiyay internetka oo muujinaya dab ka kacay bakhaarka Belgorod
Sarkaal ka tirsan Ukraine ayaa wargeyska Bild ee ka soo baxa Jarmalka u sheegay inaysan haynin xogtan markii wax laga waydiiyay dhacdada.
Waxay ku soo beegantay iyadoo saraakiisha difaaca Britain ay sheegeen in Moscow ay dib u daabulayso ciidamadeeda ku sugnaa Ukraine.
