Ciidamo katirsan Hay’adda Nabad Sugida iyo Sirdoonka Qaranka gaar ahaan kuwa loo yaqaan Duufaan ayaa magaalada Muqdisho ku dilay askari katirsanaa ciidamada booliiska sida gaarka ah u tababaran ee loo yaqaan Haramcad.
Sida aan wararka ku helnay ciidamada duufaan ayaa xalay fiidkii askarigan ka tirsanaa Haramcad oo magaciisa lagu sheegay Axmed Cabdi Keydsane ku dilay xaafada Suuqa Xoolaha ee degmada Hiliwaa, kaddib markii ay ka shakiyeen.
Goobjoogayaal ayaa ku waramay in ciidamada duufaan oo howlgal ku jiray ay ka shakiyeen askariga la dilay iyo askari kale oo la socday, waxaana halkaasi labada ciidan ku dhax maray iska horimaad sababay in la dilo Axmed Keydsane.
Saraakiil katirsan ciidanka booliiska ayaa sheegay in lasoo xiray ciidamadii ku lugta lahaa dilka askarigan, waxaana socda baaritaano lagu ogaanayo sababta keentay isku dhaca sababay geerida askariga katirsanaa booliiska Haramcad.
Askariga la dilay oo kamid ahaa ciidankii ugu horeeyay ee Haramcad ka mid noqda ayaa dhawwaan ku aqal galay magaalada Muqdisho, waxaana geeridiisa aad uga naxay qoyskiisa iyo asxaabtiisa aadka ugu dhawaa.
Xafiiska Shabakada Allbanaadir.com
Muqdisho Somalia
Allbanaadir@live.com
