Madaxweynaha Puntland Siciid Deni ayaa xilka ku celiyey agaasimihii ciidanka PSF Gen. Maxamuud Cusman Diyaano isagoo Dhinaca kale bedelay magacii heyaddaas.
Magacaabistan ayaa timid kaddib wadahadallo dhowr ah oo yeesheen Madaxweynaha iyo isimada dhaqanka gobolka Bari, kaddib xilka qaadistii agaasimaha PSF ee dagaalka ka dhacay Magaalada Boosaaso sababtay.
Sidoo kale Deni ayaa xil kale u magacaabay S/Guuto Maxamed Aamiin Cabdullaahi Xaaji Khayr oo uu horey ugu magacaabay agaasimaha PSF ka dib markii uu xilka ka qaaday Gen. Maxamuud Cusman Diyaano.
HOOS KA AKHRISO WAREEGTADA
Madaxweynaha Dowladda Puntland Mudane Saciid Cabdullaahi Deni.Kadib markii uu qiimeeyey xaaladda amni iyo dhaqan dhaqaale ee Magaalada Boosaaso. Kadib markii uu la tashaday Madaxweyne kuxigeenka Dowladda Puntland.
Kadib markii uu la tashiyo la sameeyey Guddoomiyaha Golaha Wakiilada Puntland, Isimada, Madaxweynayaashii hore, Waxgaradka iyo hay’adaha kala duwan ee Dowladda Puntland.
Kadib markii uu tixgaliyey dadaaladdii kala duwanaa ee muddada ka socday Magaalada Boosaaso ee ku wajahnaa xal u helista shaqaaqadii ka dhacday Magaalada.
Madaxweynaha Dowladda Puntland ayaa soo saaray Xeer Madaxweyne Lr. 009 , 04 March 2022, wuxuuna xeeriyay:-
- Waxaa S/Guuto Maxamed Aamiin Cabdullaahi Xaaji Khayr loo magacaabay Agaasimaha Ciidanka gaarka ah ee Sirdoonka Puntland (Puntland Intelligence Special Forces).
- Waxaa S/Guuto Maxamuud Cismaan Cabdullaahi loo magacaabay Agaasimaha Ciidanka Kommandooska Amniga Puntland (Puntland Security Commando Forces).
Si waafaqsan xeerarka iyo shuruucda Dalka u dagsan, dib ayaa laga soo saarayaa xeer nidaamiye qeexiya kala xadeynta waajibaadka guud ahaan ciidamada kala duwan ee Puntland.
*Xeerkani wuxuu dhaqan geleyaa markuu Madaxweynuhu saxiixo, Wuuna saxiixay.
DHAMMAAD
