Ciidamada Ruushka ee duulaanka xooggan ku qaaday dalka Ukraine ayaa kusii siqaya caasimadda dalkaasi, waxa ayna ciidamada Ruushka isku diyaarinayaan in ay gudaha u galaan magaalada Kyiv oo bartilmaameed ah.
Sawiiro Dayax gacmeed qaaday ayaa muujinaya gaadiid badan oo nuuca dagaalka iyo taangiyo oo kusii socda dhinaca magaalada Kyiv,waxa ayna ciidamadan duulaanka ah wataan hub aad u culus oo casri ah.
Ciidamada Ruushka ayaana doonaya in marka hore hareereeyaan magaalada Kyiv oo difaac adag uga jiraan ciidamada Ukraine, waxaana laga cabsi qabaa in magaaladaasi ka dhaco dagaal faraha looga gubto oo dhiig badan ku daato.
Shacabka ku dhaqan magaalada Kyiv ayaa aad uga cabsi qaba duulaanka kusoo wajahan magaaladooda, waxa ayna dadka qaar bilaabeen in ay sii barakacaan halka kuwa kalana ay hubka qaateen si ay qeyb uga noqdaan difaaca magaalada.
Ciidamada Ukraine ayaa wacad ku maray in ay difaacan doonaan magaalada Kyiv, waxa ayna ciidamada dhufeesyo adag ka qoteen guddaha magaalada iyo hareeraheeda si ay u fashiliyaan duulaanka Ruushka.
Madaxweynaha Ukraine ayaa cadeeyay in aysan marnaba is dhiibi doonin ayna dagaalami doonaan inta ay naf ku jirto, waxa uuna ka dalbaday waddamada saaxiibka la ah in ay lasoo gaaraan taageero milatari.
Xafiiska Shabakada Allbanaadir.com
Muqdisho Somalia
Allbanaadir@live.com
https://www.youtube.com/watch?v=ESuByydjDKA
